29 апреля 2009 г.
АПРЕЛĔН 18-19-мĕшĕсенче Хусан хулинче Раççей паттăрне, тĕнче чемпионне Николай Жеребцова асăнса кире спорчĕн тĕнчери ХХХ турнирĕ иртнĕ. Унта Раççейри, СНГ çĕршывĕсенчи тата Иранран, Италирен, Польшăран килнĕ спортсменсем вăй виçнĕ. Тĕнче пĕлтерĕшлĕ спорт ăмăртăвне Шăмăршăра пурăнакан спорт ветеранĕ, Раççей чемпионĕ, Тĕнче тата Европа чемпионачĕн призерĕ В.Шуряков та хутшăннă.
Владимир Петрович район чысне сумлăн хÿтĕленĕ. 80 килограмлă виçе категорийĕнчи 60 çултан аслăрах спортсменсем хушшинче – вĕсем 24-шар килограмлă 2 кире пуканне пĕр харăс çĕклесе вăрăм циклта ăмăртнă – вăл пĕрремĕш вырăн çĕнсе илнĕ, сумлă кубока тата тĕнче турнирĕн чемпионĕн медальне тивĕçнĕ.
Спортра пысăк çитĕнÿ тунă ятпа Владимир Петровича ăшшăн саламлатпăр, ăмăртусенче малашне те ăнăçу сунатпăр.
Турнира хутшăнма спонсор пулăшăвĕ панăшăн В.Шуряков район пуçлăхне В.Фадеева тата Л.Корчаков предпринимателе пĕтĕм чун-чĕререн тав тăвать.
Апрелĕн 25-мĕшĕнче В.Шуряков Тăвайра иртнĕ кире спорчĕн республикăри турнирне хутшăннă. Кире спорчĕ енĕпе Чăваш Енрен тухнă Раççейĕн пĕрремĕш спорт мастерне, Раççей чемпионне А.Пимулина халалланă çак ăмăртура Владимир Петрович хăйĕн виçин категорийĕнче 60тан иртнĕ спорт ветеранĕсем хушшинче пĕрремĕш вырăн çĕнсе илсе медальпе Диплома тивĕçнĕ.
Халĕ В.Шуряков майăн иккĕмĕш декадинче Ярославль облаçĕнчи Рыбинск хулинче иртекен Раççей чемпионатне хутшăнма хатĕрленет.