06 мая 2009 г.
ВИÇПŸРТ ШĂМĂРШĂРИ тĕп шкулта çиччĕмĕш класра вĕренекен М.Семенова класра çеç мар, шкулĕпех чи лайăххисенчен пĕри. Питĕ активлăскер Маша, кашни мероприятиех хутшăнма тăрăшать. Вăл – отличница, маттур спортсменка. Хĕрача тĕрлĕрен конкурс-викторинăсенче, ăмăртусенче яланах малтисен шутĕнче. Ăста юрăçă та Маша. Вăл икĕ çул Раççей Геройне О.Долгова халалласа ирттернĕ патриотла юрăсен конкурсне хутшăнчĕ, кашнинчех çĕнтерÿçĕсен ретне кĕчĕ. Район хаçачĕпе те туслă М.Семенова.
Иртнĕ çул Маша районти шкул ачисен конференцийĕнче «Асаттесен çулĕпе», кăçал «Литературная Трехизб–Шемурша» тĕпчев ĕçĕсемпе мала тухма пултарчĕ. Хĕрача çут çанталăк тусĕ те. Çакна вăл районти «Чăваш вĕрманĕн юлташĕсем» слетра ботаниксен конкурсĕнче пĕрремĕш вырăн йышăнни те лайăх çирĕплетет.
Унра организатор ăсталăхĕ те пысăк: Маша шкулта хăй йĕркеленĕ ташă кружокне ертсе пырать. Çамрăк талантсен ăсталăхне куракансем яланах пысăк хак параççĕ.
Чăваш Республикин Вĕрентÿ тата çамрăксен политикин министерстви кашни çулах ачасем хушшинче «Ман пуçарулăх» конкурс ирттерет. Маша унта ятарлă портфелю, видеопрезентаци, «Çирĕм пĕрмĕш ĕмĕрти çамрăксем» сочинени тăратнă. Мĕн тетĕр; Хальхинче те вăл – лайăххисен шутĕнче. Çавăн пекех жюри Маша хатĕрленĕ чăваш вăййисене чĕртсе тăратмалли программăна та пысăк хак панă.
Апрель уйăхĕн пуçламăшĕнче М.Семенова Шупашкарта пулчĕ, 6-10 классенче вĕренекенсен республикăри «Туслăх хĕлхемĕ» фестивальне хутшăнчĕ. Тăватă номинаципе иртнĕ вăл. «Шевле» конкурсра Маша ÿкернĕ ĕçсене пысăк хак панă, вăл – каллех çĕнтерÿçĕсен шутĕнче.