08 мая 2009 г.
ПУЛАÇÇĔ вĕт çавнашкал сăпайлă çынсем: тивĕçлипе илнĕ орден-медале те ыттисене кăтартасшăн мар, хăйсен çуралнă кунне те, юбилейне те шăв-шавсăр ирттерсе яраççĕ. «Ĕçленĕ, çавă çеç. Çынсенчен нимĕнпе те уйрăлса тăман», - теççĕ вĕсем, пурнăç пирки кăштах та пулин каласа пама ыйтсан.
Нумай çул хушши паллатăп Çĕнĕ Шăмăршă ялĕнче пурăнакан Асхать Усманович Усманова. Эпĕ мĕн ас тăвассах бригадирччĕ вăл, каярахпа «Шемуршинский» совхозăн Çĕнĕ Шăмăршă уйрăмĕн управляющийĕнче тăрăшрĕ. Сăпайлă та ырă кăмăллă, ĕçлеме юратакан, çынсемпе пĕр чĕлхе тупма пултаракан çын – çакăн пек хак парса калама пулать Асхать Усманович пирки.
Калама кăна вĕт: хĕрĕх çул ытла халăха ертсе пынă А.У.Усманов, уй-хиртен пысăк тухăç илсе пĕрре кăна мар районта çĕнтерÿçĕ пулса тăнă. Ахальтен мар ăна Тăван çĕршыв Ĕçлĕх Хĕрлĕ Ялав орденĕпе, медальсемпе чысланă. Асхать Усманович – Чăваш Республикин ял хуçалăхĕн тава тивĕçлĕ ĕçченĕ.
Тутар çынни чăваш ялне мĕнле килни çинчен ыйтсан, А.У.Усманов çапла каларĕ:
– Эпĕ кÿршĕллĕ Тутарстанри Кивĕ Кахăрлă ялĕнче çуралнă. Атте – Усман Шайхаттарович – Çĕнĕ Шăмăршă ялĕнчи çил арманĕнче мельник пулса ĕçлеме вырнаçнă та, пирĕн çемье кунта куçса килнĕ. Эпĕ чăваш ялĕнче вĕреннĕ, кунтанах салтака кайрăм, ĕмĕрĕме чăвашсем хушшинче ирттеретĕп. Тепĕр чух тутар туссем шÿтлесе хама та: «Эсĕ чăваш мар-и;» - теççĕ.
Асхать Усмановичпа унăн мăшăрĕ Сание Велиахметовна ывăлпа хĕр пăхса çитĕнтернĕ. Ирфан – районти паллă механизатор, хăй вăхăтĕнче ВЛКСМ 19 съезчĕн делегачĕ пулнă. Римма Ульяновск облаçĕнчи пĕр хуçалăх администрацийĕнче вăй хурать.
Сакăр вунă çул тултарчĕ иртнĕ кунсенче А.У.Усманов. Çак ятпа эпир ăна чун-чĕререн саламлатпăр, çирĕп сывлăх, вăрăм ĕмĕр сунатпăр.