13 мая 2009 г.
РАЙОНТА çамрăксемпе ĕçлессин эффективлăхне ÿстерес тĕллевпе район администрацийĕн вĕрентÿ, çамрăксен политикин тата культура пайĕ ял поселенийĕсем, предприятисемпе организацисем, учрежденисем хушшинче конкурс йĕркеленĕ. Район пуçлăхĕн Постановленийĕпе килĕшÿллĕн иртекен конкурсăн тĕп задачисем – çамрăксемпе ĕçлессине еплерех йĕркеленине тĕрĕс хакласси, пулăшасси, çамрăксем хушшинчи ĕç-хĕле лайăхлатма тăрăшакансене хавхалантарасси, çамрăксемпе мĕнлерех ĕçленине пĕтĕмлетесси тата паха ĕç опытне сарасси.
Çамрăксемпе ĕçлессине лайăх йĕркелес енĕпе ирттерекен районти конкурса оргкомитет – унăн председателĕ – район пуçлăхĕн çумĕ Н.Игнатьева – ертсе пырать, жюри (комисси) йышне çирĕплетет. Конкурсра – çакнашкал номинацисем: «Ял поселенийĕн çамрăксемпе ĕçлекен чи лайăх совечĕ» тата «Çамрăксемпе ĕçлекен чи лайăх предприяти (организаци, учреждени)».
Конкурс 2009 çулхи ноябрьччен пырать, темиçе тапхăрпа иртет.
Пĕрремĕш тапхăр – районти мероприятисене хутшăнни.
Ял поселенийĕсен зачет мероприятийĕсем:
1. Раççей Геройне Олег Долгова халалланă патриотла юрăсен фестивалĕ.
2. «Çамрăк çемье – 2009» конкурс.
3. «Атте, анне, эпĕ – спорт çемйи» ăмăрту.
4. Эстрада юррисен «Çамрăк сасăсем» фестивалĕ.
5. Ял çамрăкĕсен Спартакиади.
6. «Чи лайăх çамрăк дружинник» конкурс.
7. Çамрăксен КВН командисен вăййисем.
8. «Çамрăксен чи лайăх наставникĕ» конкурс.
9. «Чи лайăх çамрăк специалист» конкурс.
Предприятисен, организацисен, учрежденисен зачетне, патриотла тата эстрада юррисен фестивалĕсемсĕр пуçне, çÿлерех асăннă мероприятисемех кĕреççĕ.
Кашни мероприятие 10 баллă системăпа пăхса хаклаççĕ (пĕрремĕш вырăн – 10 балл, иккĕмĕш – 8, виççĕмĕш – 7...). Вăл е ку мероприятире малти 9 вырăнтан пĕрне те йышăнайман командăна 0 балпа хаклаççĕ. Команда миçемĕш вырăн йышăннине мероприятисенче пурĕ миçе балл пуçтарнине шута илсе палăртаççĕ.
Иккĕмĕш тапхăр – кăтартуллă мероприяти ирттерни.
Конкурса хутшăнакансем çамрăксем валли массăллă пĕр мероприяти йĕркелеççĕ. Мероприяти иртиччен икĕ эрне маларах оргкомитета тулли информаци тăратмалла (программа, участниксем çинчен материалсем, историлле е информацилле справка). Мероприятисене оргкомитет июль-октябрь уйăхĕсенче вырăна тухса хаклать. Чи ăнăçлă мероприятие 20 балпа палăртаççĕ.
Виççĕмĕш тапхăр – информаци отчетне хатĕрлесе тăратни.
Участниксем 2009 çулхи ноябрĕн 20-мĕшĕччен оргкомитета конкурс материалĕсемлĕ пакет ярса параççĕ. Унта çамрăксемпе мĕнлерех ĕçленине кăтартакан информаци отчечĕ, регламент ĕçĕн докуменчĕсем (приказсемпе постановленисен, программăсемпе плансен тата ыттин копийĕсем), фотоматериалсемпе çирĕплетнĕ, çамрăксемпе ĕçлесе пыракан тĕп çул-йĕрсен методикăлла ĕçĕсем пулмалла. Отчета çавăн пекех нормативлă-правăлла, программăлла ĕç-хĕле, укçа-тенкĕпе кадрсен тивĕçтерĕвĕн информацине тата ыттине те кĕртмелле.
Информаци отчетне папкăна вырнаçтармалла, хаçатри фотоматериалсене А4 форматлă хут листи çине çыпăçтармалла, аяла ăнлантарнине çырса хумалла. Чи ăнăçлă информаци отчечĕ 20 бала тивĕçет.
Конкурс комиссийĕ кашни номинацие 1-3 вырăнсем парса хаклать. Çĕнтерÿçĕсем район администрацийĕн Хисеп грамотине тата укçа премине илеççĕ. Пĕрремĕш вырăншăн – 5000 тенкĕ, иккĕмĕш вырăншăн – 3000 тенкĕ, виççĕмĕш вырăншăн 2000 тенкĕ парса чыслаççĕ. Спонсорсем, уйрăм çынсем е организацисем конкурс участникĕсене хăйсен призĕсемпе хисеплеме пултараççĕ.
Район конкурсĕнче пурне те ăнăçу сунатпăр.