16 мая 2009 г.
ХĔРТСЕ пăхакан хĕвелпе тата тусанпа хуралнă Сергее инçетрен паллаймарăм та. Çывăха пырсан çеç МТЗ-1221 трактор хуçи Угарин фермер иккенне пĕлтĕм.
– Çурхи культурăсене акса пĕтертĕмĕр, - хаваслăн пĕлтерчĕ Сергей. – 110 гектар урпана минерал удобренийĕпе пĕрле акрăмăр. Çĕре лайăх сухаланă, сÿреленĕ. Юлташăмсем – Геннадийпе Петр Макаровсем – пысăк пулăшу пачĕç.
70 гектар йышăнакан кĕрхи тулă лайăх хĕл каçнишĕн те савăнать фермер. Минерал удобренийĕпе туллин апатлантарнă хыççăн калча илемлĕн ешерме тытăннă.
С.Угарин кăçал 20 гектар çĕр улми лартасси çинчен те хавхаланса каларĕ. Сорчĕсем çĕнĕ, çĕре минерал удобренийĕпе апатлантарнă. Паян, çак ĕç вĕçленсен, ака пăтти çиме те пулĕ. Хресченĕн ырă йăлине Угаринсем чыслă тытаççĕ, ака пăтти малашне тата та тăрăшарах ĕçлеме вăй хушасса çирĕп шанаççĕ.