20 мая 2009 г.
ЧЕРЕТЛĔ вĕренÿ çулĕ те вĕçленсе пырать – ачасен çуллахи канăвĕ пуçланиччен вăхăт нумаях юлмарĕ. Районти шкулсенче çак тапхăра хатĕрленме тытăннă та ĕнтĕ. Ку тĕлĕшпе район администрацийĕн пуçлăхĕ ятарлă хушу та кăларнă, унпа килĕшÿллĕн шкулсенче ачасен ĕçпе кану лагерĕсене уçма хатĕрленмелли ĕçсен тата каникул вăхăтĕнче ирттермели тĕрлĕрен мероприятисен планне çирĕплетнĕ.
Çулахи ĕçпе кану лагерĕсем кашни шкултах – пĕтĕмпе 11 уçăлмалла. Вĕсенче 8-15 çулсенчи 250 вĕренекен канĕ, сывлăхне çирĕплетĕ. Вăхăта усăллă ирттерме лагерьсенче мĕн кирли пĕтĕмпех пулĕ. Ачасем смена вăхăтĕнче (вăл 21 куна тăсăлĕ) шкулсенчи вĕренÿпе сăнав участокĕсенче, ытти ĕçсенче тăрăшĕç. Никама та кичем пулассăн туйăнмасть: хĕрÿ ĕç хыççăн – тĕрлĕрен спорт ăмăртăвĕсем, конкурс-вăйăсем, викторинăсем, хаваслă походсем...
Мĕнпур мероприятисене опытлă педагогсем йĕркелесе-ертсе пырĕç. Пур çĕрте те çирĕп дисциплина пулĕ. Смена пуçламăшĕнче ачасене техника, пушар хăрушсăрлăхĕн правилисемпе, шыва кĕнĕ чух асăрхануллă пулма кирлипе паллаштарĕç.
Ашшĕ-амăшĕсен хăйсен пепкисен сывлăхĕшĕн пăшăрханмалла пулмĕ – вĕсене медицина работникĕсем тĕрĕслесех тăрĕç. Лагерьсене тĕрлĕрен медицина препарачĕсемпе, вакцинăсемпе çителĕклĕ таран тивĕçтерессине те малтанах шута илнĕ. Инфекциллĕ чирсенчен те сыхă пулăпăр.
Ĕçпе кану лагерĕсене пахалăхлă апат-çимĕç продукчĕсемпе, çурма фабрикатсемпе кăна тивĕçтерĕç, вĕсене тĕрĕслесех тăрĕç. Столовăйсенче ăста поварсем хатĕрлекен тĕрлĕрен блюдăсем ачасене килĕшессе халех шанас килет. Сăмах май, лагерьсенче канакансем тÿлевсĕрех апатланĕç. Ĕçпе кану лагерĕсенче канакан кашни ача пуçне талăкра 50 тенкĕ уйăрма палăртнă.