20 мая 2009 г.
РАЙОНТИ «Пултаруллă ачасем» çумпрограммăпа килĕшÿллĕн нумаях пулмасть «Вĕренекен – 2009» конкурс пулса иртрĕ. Унта районти шкулсенче ăс пухакан 13 вĕренекен хутшăнчĕ. Комисси вĕренекенсен 2008-2009 вĕренÿ çулĕнчи ÿсĕмĕсемпе паллаштаракан портфелиосемпе питĕ тĕплĕн паллашрĕ, çĕнтерÿçĕсене пилĕк номинацире палăртрĕ.
Аслă ÿсĕмри вĕренекенсенчен пĕрремĕшĕ Палтиелĕнчи пĕтĕмĕшле вăтам пĕлÿ паракан шкулти Алена Кузьмина (10 класс) пулчĕ, чи нумай – 255 балл пуçтарма пултарчĕ. Пăчăрлă Пашьел вăтам шкулĕнчи Ольга Крикина (11 класс) «Чи нумай пĕлекен» ята тивĕçрĕ.
«Çуталакан çăлтăр» номинацире вăтам ушкăнрисем хушшинче Карапай Шăмăршăри Олеся Лукьянована (9 класс) çитекенни пулмарĕ. Хушма пĕлÿ илес енĕпе вара («Пултарулăх çынни» номинаци) Чукал шкулĕнчи Михаил Андреев (9 класс) çĕнтерчĕ.
Комиссие çавăн пекех «Спортри ăнтăлушăн» номинаци çĕнтерÿçине палăртма та çăмăл пулмарĕ. Ку чыса Анат Чаткасри пĕтĕмĕшле пĕлÿ паракан тĕп шкулти Мария Капралова (9 класс) тивĕçрĕ.
Çĕнтерÿçĕсене район администрацийĕн вĕрентÿ, çамрăксен политикин тата культура пайĕн Дипломĕсемпе наградăларĕç, укçан преми парса хавхалантарчĕç.
Çакăн пек конкурс çитес вĕренÿ çулĕнче те ирттерме палăрать. Унта вĕренекенсем ытларах хутшăнса тарăн пĕлÿ кăтартасса кĕтетпĕр.