23 мая 2009 г.
ВЫЛЬĂХСЕНЕ кĕтĕве кăларсан вĕсен продуктивлăхĕ палăрмаллах ÿсет: ĕнесем ытларах сĕт антарма тытăнаççĕ, ытти выльăхсен ÿт хушаслăхĕ лайăхланать.
– Кăçал хуçалăхсенче кĕтĕве 510 ĕне кăларнă, - терĕ район администрацийĕн ял хуçалăхне аталантарас енĕпе ĕçлекен пайĕн тĕп зоотехникĕ Н.Вазанов.
Кунсăр пуçне сăвăнакан ĕнесем валли çуллахи лагерьсем те пур. Вĕсене «Восход» тата «Искра» ял хуçалăх кооперативĕсенче йĕркеленĕ. Чаткассем пăрусене те, патирексем вара сыснасене лагере кăлараççĕ. Çавăн пекех, «Карла» хресчен (фермер) хуçалăхĕнче те Ирçе Тĕккинче ĕнесем валли çуллахи лагерь йĕркелеме палăртнă.
Кĕтÿçсĕр кĕтÿ кĕтме пулать-и; Пулать иккен: акă, «Бездна» хресчен (фермер) хуçалăхĕнче ку ĕçе... «электрокĕтÿçĕ» пурнăçлать. Кунта ĕнесем çÿрекен вырăна пралукпа карса çавăрнă, ун витĕр вăйсăр электричество янă. Питĕ шанчăклă меслет иккен çакă.
Пĕтĕмĕшле илсен, хальлĕхе лагерьсенче – 120 ĕне. Сыснасем вара – хĕрĕх пуçа яхăн. Сăмах май, «Агрофирма «Карлинская» ЗАОра та вĕсен лагерĕ пур.
Н.Вазанов каланă тăрăх, выльăхсем валли ешĕл апат ытлашшипех – палăртнин 114 проценчĕ чухлĕ. Кĕтÿсем валли 40 гектар ыраш калчи, çарансем 110 гектар, нумай çул ÿсекен курăксене 650 гектар, пĕр çул ÿсекеннисене 190 гектар уйăрнă. Кунсăр пуçне çулса çитермелли курăксен лаптăкĕ – 140 гектар. Маларах асăннă лаптăксем çумне утă çулса илнĕ хыççăн тата 1000 гектар хутшăнмалла.
Выльăхсене кĕтĕве кăлариччен вĕсен сывлăхне тĕплĕн тĕрĕсленĕ: ĕнесенчен юн илнĕ, вĕсене çĕпĕр язвинчен, туберкулезран прививкăсем тунă.
Кĕтÿçсем пур çĕрте те çитеççĕ. Вĕсемпе пуринпе те хăрушсăрлăх техники енĕпе ятарлă инструктаж ирттернĕ, кÿпĕннĕ е чирлесе ÿкнĕ выльăхсене малтанхи пулăшу памалли майсене вĕрентнĕ.
Витесем пушаннă май, çитес вăхăтрах вĕсене юсама, хĕле хатĕрлеме тытăнаççĕ.