27 мая 2009 г.
МАЙĂН 17-мĕшĕнче Мускаври Союзсен çурчĕн Колонна залĕнче «Пултаруллă ачасем – 2009» тĕнче форумĕн лауреачĕсене чысланă. «Талантлă çамрăксем – чечекленекен Тăван çĕршыв – телейлĕ планета» девизпа иртнĕ Мускав форумĕнче 2009 çулта Раççейри тĕрлĕ регионсен 619 участникĕ призлă вырăнсене тивĕçнĕ. Форумăн 20 номинацийĕ тăрăх çак шутран 100-шĕ Гран-при Диплом тата призсем илнĕ. Вĕсем форумăн 3 турĕ тăрăх ăнăçлă тухнă.
Шăмăршă вăтам шкулĕ çумĕнчи ачасен кăтартуллă «Фламинго» ташă ансамблĕнчи Светлана Ельцована, Кристина Матросована тата Наталья Шамеевана «Хореографи конкурсĕ» номинацире Колонна залĕнче Гран-при парса чысланă. Ольга Филиппова вара («Ылтăн алăсем» ача-пăча пĕрлешĕвĕ») «Халăх творчестви» номинацире пĕрремĕш вырăн çĕнсе илнĕ. Райадминистрацин вĕрентÿ, çамрăксен политикин тата культура пайĕн начальникĕ Н.Г.Игнатьева, хушма вĕрентÿ педагогĕсем В.П.Кузьмина тата М.А.Шамеева Раççейри ачасен талантне малалла аталантарма, пĕлĕвне ÿстерме пысăк тÿпе хывнăшăн Диплома тивĕçнĕ.
Форумра «Фламинго» ташă ансамблĕнчи Нарспи евĕр хитре хĕрсем, тухья тата чăваш çи-пуçне тăхăннăскерсем, кăтартуллă майпа чăвашсен икĕ ташшине питĕ илемлĕн ташласа кăтартнă. Пикесен ташшине тулли зал ăшшăн алă çупса йышăннă.