27 мая 2009 г.
МАЙĂН 21-22-мĕшĕсенче Шăмăршăра Чăваш Республикинчи çамрăк армеецсен «Орленок» тата «Зарница» çар вăййисен районти финалĕ иртнĕ. Унта çамрăк армеецсен «Зарница» вăййин 10 отделенийĕ тата «Орленок» вăййин 3 отделенийĕ хутшăннă. Финалти вăйăсене савăнăçлă лару-тăрура уçнă çĕре район пуçлăхĕн çумĕ Н.Г.Игнатьева тата Патăрьелпе Шăмăршă районĕсен çар комиссарĕ Д.Н.Захаров хутшăннă.
Икĕ куна пынă çивĕч кĕрешÿре «Орленок» тата «Зарница» вăййисенче чи пултаруллисем палăрнă. Командăсен пĕтĕмĕшле зачетне шута илсен, «Орленок» вăйăра Шăмăршăри вăтам шкул – пĕрремĕш, Пăчăрлă Пашьелĕнчи вăтам шкул – иккĕмĕш, Палтиелĕнчи вăтам шкул – виççĕмĕш, «Зарница» вăйăра Карапай Шăмăршăри вăтам шкул – пĕрремĕш, Шăмăршăри вăтам шкул – иккĕмĕш, Пуянкассинчи вăтам шкул виççĕмĕш вырăн йышăннă. Çĕнтерÿçĕсемпе призерсене район администрацийĕн вĕрентÿ, çамрăксен политики тата культура пайĕ Кубоксемпе, призсемпе тата Грамотăсемпе наградăланă.