30 мая 2009 г.
ĔÇЧЕН те хастар çынсем сахал мар Пăчăрлă Пашьел ялĕнче. Вĕсенчен пĕри – Н.А. Анисимов.
Мĕн ачаран ĕçе, тăван уй-хире, çут çанталăка юратса ÿснĕ вăл. Сакăр класс вĕренсе пĕтернĕ хыççăн Коля Курган хулинче тракторист профессине алла илнĕ, салтакран таврăнсан тăван колхозра механизатор пулса ĕçлеме тытăннă. Хăйĕн тивĕçне чыслăн пурнăçланă вăл. Техникăна яланах юсавлă тытнă, ĕçри хастарлăхшăн Хисеп грамотисемпе хаклă парнесене сахал мар тивĕçнĕ. Николай Андреевич – «Хисеп Палли» тата «Ĕçлĕх Хĕрлĕ Ялав» орденсен кавалерĕ, Чăваш Республикин тава тивĕçлĕ механизаторĕ.
Аллисем чăннипех ылтăн Н.Анисимовăн. Пĕрре те ахаль лармасть вăл – яланах ĕçлĕ. Ăна-кăна ăсталама та маçтăр – Николай Андреевич килте хăй вăйĕпех мотоблок пухса хатĕрленĕ. Çавăн пекех, ун аллисем витĕр тухнă йывăçпа тата металпа ĕçлемелли токарь станокĕсем, арман шанчăклă ĕçлеççĕ.
Çавах та Н.Анисимов – чунпа та, юнпа та хресчен, ун кăвапи ĕмĕрлĕхех тăван çĕрпе çыхăннă. Хăйĕн мăшăрĕпе – Зинаида Ивановнăпа – вĕсем картиш тулли выльăх-чĕрлĕх, чăх-чĕп усраççĕ, вĕллесем те тытаççĕ.
Кустăрмаллă трактор та пур ялти ятлă çыннăн. Вăл ăна пĕрре те ахаль лартмасть темелле, хăйĕн ĕçĕсене пурнăçланисĕр пуçне ял çыннисене те пулăшма тăрăшать – нихăçан та ÿкĕтлеттерсе тăмасть. Хăйĕн пилĕк ачине те пĕчĕкрен тăван çĕре юратма вĕрентсе ÿстернĕ вăл.
Хальхи вăхăтра Николай Андреевич «Бездна» фермер (хресчен) хуçалăхĕнче тăрăшать, кунта та хăйĕн хастарлăхĕпе палăрса тăрать. Тивĕçлĕ канăва тухнă пулин те, тăван çĕртен уйрăласшăн мар хастар ĕçчен. Вăл – хуçалăхри чи лайăх комбайнерсенчен пĕри, çамрăксен наставникĕ.