06 июня 2009 г.
ÇУЛЛА çитнĕ май, строительсемшĕн хĕрÿ тапхăр пуçланчĕ. Шăмăршăри «Христос çурални» çĕнĕ чиркÿ тăвасси халĕ малалла пырать. О.Мусаткин ертсе пыракан бригада тĕп купол лартмалли стенасене купаласа пĕтернĕ, халĕ чиркÿ чанĕ вырнаçтармалли башньăна хăпартать. Ĕç пахалăхĕ – тивĕçлĕ шайра. Бригада валли А.Матвеева тутлă апат пĕçерсе тăрать. Ăна çамрăк хĕр – И.Матвеева пулăшать.
Чиркÿ настоятелĕ Николай протоиерей службăран пушă вăхăт пулсанах сăваплă объекта килет, бригада ĕç-хĕлне йĕркелет, строительство материалĕсем кÿрет, пахалăхшăн тимлет, час-часах хăй те çанă тавăрса ĕçлет. Строительство материалĕсем енĕпе вара лару-тăру çăмăлах мар. Çак çивĕч ыйтупа Николай аттен нумай чупма тивет. Патшалăх пулăшăвĕсĕр тăвакан чиркÿ ĕçĕсене малалла пурнăçлама, паллах, питĕ йывăр. Вĕсем, тĕпрен илсен, чиркÿ тупăшĕ тата çынсен ыркăмăллăхĕ çинче никĕсленсе тăраççĕ.
– Хальлĕхе ĕçлеме строительство материалĕсем пур-ха, - терĕ Николай атте. – Анчах Турă пилĕпе пыракан сăваплă ĕçе вĕçлеме вĕсем питĕ нумай кирлĕ. Чиркÿ тума пулăшакан çынсем малашне те тупăнсах тăрасса çирĕп шанатпăр эпир. Объекта малалла тума пулăшнăшăн «Агростройсервис» ООО ертÿçине, ЧР Патшалăх Канашĕн депутатне А.Максимова, «Строитель» ОООн генеральнăй директорне, ЧР тава тивĕçлĕ строительне Н.Быкова, çул-йĕр тăвакан, юсакан Шăмăршă участокĕн начальникне В.Фадеева тата ыттисене чиркÿ совечĕн ятĕнчен чĕререн тав тăватăп, хăйсен ĕçне малашне те ăнăçлă пурнăçлама ырлăх-сывлăх сунатăп. Чиркÿ тума пулăшакан çынсен ыркăмăллăхĕ Турă пиллĕхĕпе таврăнĕ.
Çирĕп ĕненетĕп: çĕнĕ чиркÿ чанĕ янăратех!