10 июня 2009 г.
КУЛЬТУРА ĕçченĕсем районти ĕçпе юрă тата спорт уявĕнче – Акатуйра – халăха çуллен тулли содержаниллĕ тата интереслĕ программăпа савăнтараççĕ. Çак кунсенче пирĕн корреспондент район пуçлăхĕн заместителĕпе – райадминистрацин вĕрентÿ, çамрăксен политикин тата культура пайĕн начальникĕпе Н.Г.ИГНАТЬЕВАПА тĕл пулса калаçнă, унран кăçалхи уяв программи пирки каласа пама ыйтнă.
– Акатуй кунĕнче районти ял поселенийĕсен илемлĕ пултарулăх коллективĕсем ирхине 9 сехетре Шăмăршăри Культура керменĕн площадьне пуçтарăнма пуçлаççĕ, – терĕ Наталья Германовна. – 9 сехет те 20 минутра вĕсем хаваслă юрăсем юрласа вăрман уçланкинчи тĕп сцена патнелле утаççĕ.
Çĕр ĕçченĕн тата Çамрăксен çулне, Аслă Отечествăлла вăрçăра фашистла Германие çĕнтернĕренпе 65 çул çитсе пынине халалланă Акатуй программи «Çурхи илем» театрализациленĕ хореографи композицийĕпе уçăлать.
– Наталья Германовна, районти пĕрлештернĕ хор кăçалхи Акатуйра мĕнлерех юрăсем шăрантарать-ши;
– Пысăк коллективăн программи «Юратнă тăван уй-хир» (сăм.В.Давыдов-Анатрин, кĕв. Г,Хирбюн, дирижерĕ Е.Еремеева) юрăпа пуçланать. Кун хыççăн вăл район уявне килнĕ халăха «У моей России» юрăпа савăнтарĕ (солисчĕсем Е.Воронцовапа В.Павлов).
– Ял поселенийĕсен илемлĕ пултарулăх коллективĕсен районти фестивалĕн çĕнтерÿçисене Кубокпа тата Хисеп грамотипе чысланă хыççăн Шăмăршă тăрăхĕнчи чи пултаруллă сцена ăстисем концерта малалла тăсаççĕ...
– Çапла. Районти фестивальте палăрнă чи лайăх коллективсемпе уйрăм солистсем хăйсен художество номерĕсемпе Акатуя илем кÿрĕç. Район çыннисем кашни ял поселенийĕн тата хăш-пĕр шкулăн сцена ăстисен пултарулăхĕпе паллашĕç. Уяв программинче чăваш, тутар, вырăстата ирçе юрри-ташши пулĕ.
– Ырă йăлана малалла тăсса, выставка-ярмарка та йĕркелетĕр-и;
– Паллах. Акатуйра ялсенчи пултаруллă çынсен тĕрлĕ алăсталăх япалисен куравне ирттерĕпĕр. Кăмăл пулсан, вăл е ку япалана уява килнисем туянма та пултарĕç. Выставкăна тĕплĕн пăхса тухма районта комисси те йĕркеленĕ. Çĕнтерÿçĕсем призсем илĕç.
Кунсăр пуçне, районта Раççей Федерацийĕн наци проекчĕсем мĕнлерех пурнăçланса пынине кăтартакан илемлĕ выставка-стендсем те пулаççĕ.
Тĕрлĕ аттракционсемпе спорт вăййисем те районти Акатуй пĕлтерĕшне ÿстерĕç, ăна интереслĕрех тума май парĕç.
Сăмахăма вĕçленĕ май район çыннисене тата хăнасене июнĕн 12-мĕшĕнче ĕçпе юрă уявне килме йыхравлатăп. Акатуй интереслĕ иртесси, район халăхне лайăх канма тивĕçлĕ условисем туса парасси пирĕн тĕп тĕллев пулса тăрать. Уявра пурте пĕрле канăпăр, тăрăшса ĕçлеме çĕнĕ вăй-хăват пухăпăр.