10 июня 2009 г.
ИЮНĔН 1-мĕшĕнче Шăмăршăра районти ача-пăча обществăлла организацийĕсен фестивалĕ пулса иртрĕ.
Фестиваль Шăмăршăри вăтам шкулта уçăлчĕ. Делегатсене педагогика ĕçĕн ветеранĕ, Чăваш Республикин тава тивĕçлĕ учителĕ Р.С.Минеева тата Артекра вожатăйра ĕçленĕ, 1998 çулта «Раççейри чи лайăх учитель» ята тивĕçнĕ Александр Семенов ăшшăн саламларĕç.
Интереслĕ конкурс кăтартăвĕсене пĕтĕмлетсен, 1-2 вырăнсене Шăмăршă вăтам шкулĕнчи «Асамат кĕперĕ» ача-пăча республики тата çак шкулта аслă классенче вĕренекенсен «Лидер» пĕрлешĕвĕ, 3 вырăна Васан вăтам шкулĕнчи «Росток» ача-пăча организацийĕ йышăнни паллă пулчĕ.
Фестивалĕн малаллахи пайĕ Шăмăршăри Культура керменĕнче иртрĕ. Делегатсене район администрацийĕн вĕрентÿ, çамрăксен политики тата культура пайĕн начальникĕ Н.Г.Игнатьева хĕрÿллĕн саламларĕ, ăмăртусенче ăнăçу сунчĕ. Конкурссенче çĕнтерсе, «Ача-пăча обществăлла пĕрлешĕвĕсен лидерĕ» номинацире Виçпÿрт Шăмăршăри тĕп шкулти Мария Семеновапа Палтиел вăтам шкулĕнчи Алена Кузьмина пĕрремĕш, Кивĕ Чукалти тĕп шкулти Кристина Савельевапа Патирекри тĕп шкулти Юлия Крылова – иккĕмĕш, Анат Чаткасри тĕп шкулти Мария Капраловапа Шăмăршă вăтам шкулĕнчи Мария Дмитриева виççĕмĕш вырăн йышăнчĕç.
«Çамрăксен обществăлла пĕрлешĕвĕн лидерĕ» номинацире Шăмăршă вăтам шкулĕнчи çамрăк специалистсен канашĕн председателĕ Надежда Милюшкина палăрчĕ.
Çĕнтерÿçĕсене Грамотăсемпе тата Кубоксемпе чысларĕç.