24 июня 2009 г.
РАЙОНТИ шкулсенчи ачасем валли канупа сывлăх лагерĕсем ĕçлеççĕ. Вĕсенче хĕрачасемпе арçын ачасем тĕрлĕрен мероприятисем, спорт ăмăртăвĕсем йĕркелеççĕ, похода, экскурсие çÿреççĕ. Шăмăршăри пĕтĕмĕшле вăтам пĕлÿ паракан шкулти «Одуванчик» лагере те 2-4 классенче вĕренекенсем хаваспах çÿреççĕ. Вĕсене лагерь ертÿçи Н.Милюшкина кашни кунах хапăл туса кĕтсе илет, кун программипе паллаштарать.
Çуллахи ăшă та хĕвеллĕ кунсенче вĕренекенсем мĕн чухлĕ вăйă, викторина, ăмăрту ирттермеççĕ-ши; Вĕсем вăрмана çитсе тĕрлĕрен сиплĕ курăксем пухнă, кайăк-кĕшĕк юррине итленĕ, унти асамлăха сăнаса тĕлĕннĕ. А.С.Пушкин çырнă юмахсем çинчен те калаçу пуçарнă лагерьти ачасем. Унăн сăввисене те вуланă. Раççей кунне халалласа юрăсен уявĕ пулнă лагерьте. Юрă хыççăн юрă шăрантарнă хĕрачасемпе арçын ачасем. Вĕсен хаваслă юрри инçене-инçене илтĕннĕ. Лагере çÿрекенсем стена хаçачĕ те кăларнă, асфальт çине пурăпа ÿкерчĕксем те тунă, «Чĕрчунсен тĕнчинче» ятпа викторина та йĕркеленĕ т . ыт. те. Спорт ăмăртăвĕсем те пысăк вырăн йышăнни паллă ĕнтĕ. Вĕренекенсем сывлăхлă та тĕреклĕ пулччĕр тесе, «Одуванчикре» кашни кунах вăйăсем, ăмăртусем иртеççĕ.
Карапай Шăмăршă шкулĕнчи «Хĕвел» лагерь те ăнăçлă ĕçлет. Кунта та кашни кунах ачасен хаваслă сасси илтĕнсе тăрать. Тĕрлĕ ăмăртусем, вăйăсем, конкурссем питĕ интереслĕ иртеççĕ, пурне те килĕшеççĕ.
Шкулсенчи канупа сывлăх лагерĕсенче вĕренекенсем чăннипех вăхăчĕсене усăллă ирттереççĕ. Вĕсенче ачасем алли-урисене те, пуçĕсене те ĕçлеттереççĕ.