27 июня 2009 г.
– ÇАМРĂКЛĂХ – чи хавас та илемлĕ вăхăт. Хĕр-упраçпа яш-кĕрĕмĕн юн вĕресе кăна тăрать. Сирте çĕршыв пуласлăхĕ те малашлăхĕ. Хăвăр тăрăшсан вара ăнăçу та пулатех, - саламланă май ырă сунчĕ Кивĕ Шăмăршăри стадионта Çамрăксен кунне халалласа ирттерекен спорт уявне пухăннă хĕрсемпе каччăсене район администрацийĕн вĕрентÿ, çамрăксен политики тата культура пайĕн пуçлăхĕ Н.Игнатьева.
Çамрăксен кăмăлне кура çанталăкĕ те питĕ лайăх пулчĕ çав кун: тÿперен сарă хĕвел хăй ăшшине сапаларĕ, вăркăш çилĕ вĕрсе тĕрлĕ тĕслĕ япавсене вĕлкĕштерчĕ. Савăк кăмăллă та çутă сăнлă çамрăксем ăмăртусем питĕ интереслĕ те хĕрÿ пуласса малтанах систерсе хучĕç.
Çамрăксен спорт уявĕ икĕ хĕрпе икĕ каччăран йĕркеленĕ эстафетăпа пуçланчĕ. Хĕрсем 200-шер, каччăсем 400-шер метра чупса тупăшрĕç. Финиша чи малтан Пăчăрлă Пашьел ял поселенийĕн команди çитрĕ. Иккĕмĕшпе виççĕмĕш вырăнсене Карапай Шăмăршă командипе Анат Чаткас команди йышăнчĕç.
Кăткăс та интереслĕ ăмăртусенчен тепри вĕрен туртса вăй виçни пулчĕ. Ултă çамрăкран тăракан командăсем шăлĕсене çыртсах тапаçланчĕç. Чукал ял поселенийĕн команди ку енĕпе чи вăйли пулчĕ – вĕсем пĕрремĕш. Карапай Шăмăршă çамрăкĕсем – иккĕмĕш, Шăмăршăри пĕтĕмĕшле вăтам пĕлÿ паракан шкулăн харсăр ĕçченĕсем – виççĕмĕш.
Армспорт енĕпе кĕрешекен çамрăксем те сахалăн пулмарĕç. Хĕрсен ушкăнĕнче чи вăйлисем çаксем пулчĕç: С.Моисеева (Шăмăршăри ачасемпе çамрăксен спорт шкулĕ), А.Шомполова (Карапай Шăмăршă), М.Емдюкова (Васан). Паттăр арсем хушшинче малти вырăнсене Л.Храмов (Чукал), В.Антонов (райадминистрацин вĕрентÿ, çамрăксен политики тата культура пайĕн специалисчĕ), И.Ларшников (Васан) пайларĕç.
Мечĕк хыççăн чупма кăмăллакансем мини-футболла вылярĕç. Ăнăçлă выляканĕсем Шăмăршăри ачасемпе çамрăксен спорт шкулĕн, Карапай Шăмăршăпа Пуянкасси ял поселенийĕсен командисем пулчĕç.
Волейбол турнирĕнче пĕрремĕш вырăна Пуянкасси ял поселенийĕн команди тухрĕ. Иккĕмĕшпе виççĕмĕш вырăнсенче – Шăмăршăри ачасемпе çамрăксен спорт шкулĕпе Карапай Шăмăршă командисем.
Спартакиадăна пĕтĕмлетсен, малти вырăнсене ял поселенийĕсем хушшинче Карапай Шăмăршă, Пуянкасси, Чукал ял поселенийĕсен командисем çĕнсе илчĕç. Учрежденисем, предприятисем хушшинче вара пĕрремĕш вырăнта – Шăмăршăри ачасемпе çамрăксен спорт шкулĕ, иккĕмĕшпе виççĕмĕш – райадминистраципе Шăмăршăри пĕтĕмĕшле вăтам пĕлÿ паракан шкул.
Ăмăртусенче малти вырăнсене йышăннă командăсене Грамотăсемпе хаклă парнесем парса чысларĕç.
Спорт уявне ирттерме пулăшнăшăн йĕркелÿ комитечĕ Васан ял поселенийĕн пуçлăхне С.Ястребова, судьясене чĕререн тав тăвать.