27 июня 2009 г.
САККУН тăрăх, халăх çыравĕ 10 çулта пĕр хут иртме тивĕçлĕ. Юлашки компани 2002 çулхи октябрĕн 9-16-мĕшĕсенче иртнĕччĕ тата вăл çĕршыв экономикишĕн питĕ кирлĕ сведенисем панă. Халăх çыравĕн йĕрки çинчен перепись ирттерес тĕлĕшпе ĕçлекен районти уполномоченнăй Л.П.Вашуркина каланă тăрăх, çитес çулхи халăх çыравĕнче çынсем çинчен информаци пухмалли тĕрлĕ меслетсемпе усă курĕç. Пĕрремĕшĕ – йăлана кĕнĕ меслет – ыйтса пĕлни. Шута илекен килĕрен çÿресе, çын сăмахĕнчен бланксем çырса тултарать. Иккĕмĕш меслет – çырав хучĕсене çын хăй çырса тултарни. Çакăн пек меслетпе усă курнă чухне шута илмелли бланксене конвертпа почта урлă ярса параççĕ е вĕсене переписчик кÿрсе парать. Çырса тултарнă бланксене граждансем почтăпа кăтартнă адрес тăрăх Росстатăн территорири органне ярса параççĕ е вĕсене переписчик хăй илсе каять. Çак меслете халăха меллĕрех пултăр тесе тунă. Анкетăра 19 ыйту пулать. Роспондентсен çулĕ, çемьери курăнăвĕ, национальноçĕ, ĕç вырăнĕ, ют чĕлхесене пĕлни, тупăшĕ çинчен сведенисене пухĕç. Çырава мĕнле-тĕр сăлтава пула килĕсенче пурнăçлама пултарайман çынсемшĕн стационарлă участоксем пулаççĕ. Вĕсен ĕçне гражданиншăн меллĕ пултăр тесе (ĕçе, вĕренĕве кайнă чухне – çула май) йĕркелеççĕ.
Районта çырав тĕлне пысăк хатĕрленÿ пырать. Тивĕçлĕ йĕркелÿ, хатĕрлĕх мероприятийĕсем ирттересси çинчен район пуçлăхĕн В.П.Фадеевăн йышăнăвĕ тухнă, вăл ертсе пынипе халăх хисепне шута илес тата çырава ирттерес ыйтусене координацилекен комисси ĕçлет. 2009 çулхи январĕн 1-мĕшĕнчен хушма представительсене ĕçе йышăннă. Халĕ районта адрессене, урам ячĕсене, çурт, хваттер номерĕсене çĕнетес, туллилентерес ĕç пырать. 2009 çулхи июлĕн 1-мĕшĕ тĕлне районта урам ячĕсене кăтартнă аншлагсем вырнаçтарасси, çуртсен номерĕсене çирĕплетесси вĕçленме тивĕçлĕ. Çавăн пекех июлĕн 1-мĕшĕ тĕлне ял поселенийĕсен чиккисен тĕрĕслĕхне тишкерес, пурăнмалли пунктсен, уйрăм çуртсен ячĕсене палăртас, вĕсен çĕнетнĕ планĕсене туса хатĕрлес ĕçсем вĕçленеççĕ.