04 июля 2009 г.
ÇАМРĂК чухне профессие тĕрĕс суйласа илсе, хăйсен пĕтĕм пурнăçне юратнă ĕçпе çыхăнтарнă çынсем – чăннипех те чи телейлисем. Вĕсен шутне Васанти Е.Лукьянована та кĕртме пулать. 1978 çултанпах, Шупашкарти кулинари училищинче вĕренсе повар-кондитер-сутуçă специальноçне илнĕренпех, райпо системинче вăй хурать вăл.Унăн ĕç биографийĕ Шăмăршăри «Красный бор» ресторанта пуçланнă. Повар ĕçне пысăк хастарлăхпа пуçăннă Васан хĕрĕ. 2 çул ĕçлесен, ĕçченлĕхĕпе пултарулăхне кура, Ленăна аслă повар пулма çирĕплетнĕ. Çак должноçра 6 çул вăй хурсан тăван ялти вăтам шкул столовăйĕн заведующийĕнче ĕçлеме пуçланă. Елена Петровна унта та апата тутлă, ачасен кăмăлне каймалла пĕçерсе хатĕрленĕ.
1996 çулта Е.Лукьянова Васан лавккин заведующийĕн должноçне йышăннă. Ял çыннисен ыйтăвĕсене май килнĕ таран туллинрех тивĕçтерме тăрăшнă вăл.
2003 çулта шăпа ăна каллех Шăмăршăри «Красный бор» кафене илсе çитернĕ. Унта вăл паянхи кунчченех аслă поварта ĕçлет.
– Елена Петровна хăйĕн тивĕçне яланах тÿрĕ кăмăлпа пурнăçлама тăрăшать, – терĕ Чăвашпотребсоюз пĕрлешĕвĕн Шăмăршăри подразделенийĕн ертÿçи З.Тукаева. – Нихăçан та сехет çине пăхса ĕçлемест вăл.
– Е.Лукьянова – хăйĕн ĕçĕнче ăста специалист, 6 разрядлă повар, - хутшăнчĕ калаçăва производство начальникĕ М.Родионова. – Поварсен ĕç-хĕлне кирлĕ пек йĕркелесе пырать. Апатланакансем поварсен ĕçĕпе яланах кăмăллă юлаççĕ.
Пуринпе те килĕштерсе ĕçлет аслă повар. А.Елисеева, Г.Куропаткинапа О.Якушова поварсемпе, Т.Чугуновапа Е.Тихонова буфетчицăсемпе, В.Ефимова кухня работниципе пĕр-пĕрне ăнланса ĕçлени çынсене апатпа тивĕçтерессине кирлĕ шайра илсе пыма май парать.
Ĕçне кура – хисепĕ. Е.Лукьянована «Чăваш Республикинчи потребительсен кооперацийĕн ветеранĕ» знакпа, Чăвашпотребсоюзăн тата райпон Хисеп грамотисемпе наградăланă. 1985 çулта унăн сăн ÿкерчĕкне Чăвашпотребсоюзăн Хисеп хăми çине вырнаçтарнă.
Елена Петровна хăйĕн мăшăрĕпе, Геннадий Николаевичпа, 2 хĕрпе пĕр ывăл ÿстерсе çитĕнтернĕ, тивĕçлĕ воспитани панă. Ĕçчен çемье ялта «Çăл куç» фермер хуçалăхне те йĕркеленĕ. Лукьяновсем сысна амисем çăвăрлаттарассипе, вăкăрсем самăртассипе ĕçлеççĕ. Хуçалăхра МТЗ-82 тракторпа ГАЗ-53 автомашина та пур.
Июлĕн 3-мĕшĕнче Е.Лукьянова 50 çул тултарчĕ. Чаплă юбилей ячĕпе ăна савнă мăшăрĕ, юратнă ачисем, тăванĕсем, кÿршĕ-аршисем, ĕçтешĕсем ăшшăн саламларĕç, çирĕп сывлăхпа тулли телей, ĕçре малашне те ăнăçу сунчĕç.