08 июля 2009 г.
РЕДАКЦИЕ яра куна темиçе çын та кĕрсе тухать. Хăшĕсем хыпар-хăнар пĕлтереççĕ, çыру парса хăвараççĕ, теприсем ахаль калаçса ларма, чунĕсене пусарма кĕреççĕ. Акă, хальхинче Шăмăршăра пурăнакан ĕç ветеранĕ В.К.Захаров кĕчĕ те, тÿрех хăйне хумхантаракан ыйтăва çĕклерĕ.
– Милĕк хатĕрлеме çамрăк хурăнсене пĕр шелсĕр касаççĕ, - пăшăрханса калаçрĕ Вячеслав Кириллович. – Вăрмана пуртăпа е пăчкăпа кайма пуçларĕç. Ĕлĕкрех эпир вăрман делянкинче çеç милĕк хатĕрленĕ, лесникран ыйтмасăр пĕр турат та хуçман. Халĕ пурте «хам хуçа!» теççĕ пулмалла, çут çанталăка пысăк сăтăр тăваççĕ.
Ватă çын сăмахĕ (Вячеслав Кириллович часах 80 çул тултарать) журналистсене те хумхантарчĕ. Чăнах та, миçе пин тĕп хурăн пĕтмест-ши Шăмăршă вăрманĕнче мунча милĕкĕ хатĕрлесе; Вăрмантине çеç мар, çул хĕррипе лартнă хурăнсене те касаççĕ. Малашне те çапла чунсăрла хăтлансан, çитес ăрусем валли мĕн юлĕ;
Хурăна çуркунне, сĕткенне ĕçес тесе те пысăк сиен тăваççĕ. Мĕнпе айăпа кĕчĕ-ха çак йывăç çынсем умĕнче; Илемĕпе-и, йăрăс пĕвĕпе-и, е тата хĕрÿ вуттипе-и;
Милĕк хатĕрлеме пачах чарасшăн мар-ха эпĕ, хурăна тĕпрен касса мар, хăш-пĕр турачĕсене хуçса илсе те чипер милĕклĕхех пуçтарма пулать вĕт. Ватăрах çынсем çапла тăваççĕ те. Вăрмана пырсан лесникпа тĕл пулăр, вăл сире милĕк хатĕрлеме ăçта юранине кăтартĕ. Хăвăр тĕллĕн, пуçтахланса çÿрес марччĕ, сире пула çут çанталăк хĕн-асап ан тÿстĕрччĕ.
Вăрманта вут-кăварпа асăрхануллă пуласси пирки те аса илтерес килет. Пирус-сигарет туртмасăр чăтма пулать вĕт-ха, мĕншĕн вăрманшăн пысăк хăрушлăх кăларса тăратас; Кăвайт чĕртме вара пачах та юрамасть. Çакна хăвăр та асра тытăр, ыттисене те каласа ăнлантарăр.