08 июля 2009 г.
ШĂМĂРШĂ районĕн пуçлăхĕ В.П.Фадеев ачасен çуллахи канăвне йĕркелесси çинчен кăларнă йышăнăва тата Раççей Федерацийĕпе Чăваш Республикин тĕп санитари врачĕсен йышăнăвĕсене пурнăçласа, районта пысăк ĕç туса ирттернĕ. Вун пĕр шкулта 13 сывлăх лагерĕ йĕркеленĕ, вĕсенче 250 ача кăнтăрлахи вăхăтра сывлăха тĕреклетет. Лагерьсенчи санитарипе эпидемиологи лару-тăрăвне çирĕп тĕрĕслесе тăратпăр.
Сăмахран, лагерьсем усă куракан шывăн 22 тĕслĕхне тĕрĕсленĕ, Чукал шкулĕнчи ĕçмелли шыв гигиена требованийĕсене тивĕçтерменни палăрнă. Апат-çимĕç пахалăхне тата тутă тытассин шайне (калорийность) тĕрĕсленĕ чух Палтиелĕнчи, Шăмăршăри, Пăчăрлă Пашьелĕнчи вăтам шкулсенчи лагерьсенче илнĕ тĕслĕхсем гигиена нормисене тивĕçтермен.
Лагерьсенче инфекци чирĕсем сарăлнине тупса палăртман.
Çу кунĕсенче лагерьсенчи столовăйсене пахча-çимĕçпе, улма-çырлапа ытларах тивĕçтерсен аван пулĕччĕ. Шкулсен хăйсен те сад-пахча пур, çырла йывăççисем çеç сахалрах. Çитес çулсенче сад ĕрчетесси çине ытларах тимлĕх уйăрасчĕ.