15 июля 2009 г.
ÇАРПА патриотизм клубĕсемпе пĕрлешĕвĕсем çĕршер арçын ачапа хĕр ачана Тăван çĕршыва чĕререн юратма, сывă пурнăç йĕркине тытса пыма, хамăрăн историе тĕплĕнрех пĕлме вĕрентеççĕ. Хăшне-пĕрне вара çар профессине суйласа илме те пулăшаççĕ.
Шăмăршăри вăтам шкул çумĕнчи «Паттăрлăх» çарпа патриотизм клубĕн ырă ячĕ республикипех паллă. Июнĕн 25-29-мĕшĕсенче «Паттăрлăх» клуб членĕсем, Ю.Ф.Ермолаев учитель ертсе пынипе, республикăри çамрăк армеецсен Муркаш ялĕнче иртнĕ 41-мĕш финал вăййисене хутшăнчĕç.
Республикăри 31 çарпа патриотизм клубĕ хушшинче виççĕмĕш вырăн йышăнма пултарни – «Паттăрлăхшăн» пысăк çитĕнÿ. Творчество, теори, çарпа спорт, хĕç-пăшала тĕплĕн пĕлесси тата ытти блоксенче Шăмăршă ачисем тарăн пĕлÿ илнине кăтартнă. Çавăн пекех гражданла-патриотикăлла тематикăпа ирттернĕ блоксенче компьютер тестированийĕ витĕр те ăнăçлă иртнĕ.
Мухтанатпăр сирĕнпе, çамрăк армеецсем!