15 июля 2009 г.
НУМАЯХ пулмасть Пăчăрлă Пашьелĕнчи Вера Борисова патне çар штемпелĕллĕ çыру килнĕ. Ăна хальхи вăхăтра Тинĕс-çар флотĕнче службăра тăракан Александр Борисов аслă матросăн чаç командирĕ çырса янă.
«Хисеплĕ Вера Васильевна! – çырать иккĕмĕш рангри капитан С.Охремчук. – Акă, сирĕн ывăлăр Тăван çĕршыва чыслăн та тивĕçлĕн хÿтĕлеме сăмах парса Присяга тытнăранпа 2 çул ытла иртсе кайрĕ ĕнтĕ. Çак тапхăрта Александр çар специальноçне тивĕçлипе алла илсе, хăйĕн ĕçĕнче класлă специалист пулса тăчĕ, çар ăсталăхне малалла туптать. Çар хатĕрленĕвĕн нормативĕсене тултарас енĕпе те лайăх результатсем кăтартать.
Хăйĕн служба тивĕçĕсене сирĕн ывăлăр яланах тÿрĕ кăмăлпа туса пырать, çавна май ăна чаç командованийĕ пурĕ 7 хутчен тав тунă.
Командирсем хушнине вăхăтра пурнăçлать, аслă юлташĕсене, пĕрле службăра тăракан матроссене хисеплет, çавна май карап коллективĕ те ăна сума сăвать.
Ывăлăра лайăх воспитани парса ÿстернĕшĕн командовани ятĕнчен тата хам ятран сире ăшшăн тав тăватăп, хисеплĕ Вера Васильевна. Эсир Тăван çĕршывăн чыслă хÿтĕлевçине ÿстерсе çитĕнтернĕ, ывăлăрпа тивĕçлипе мухтанма пултаратăр. Законпа палăртнă служба срокне вĕçленĕ хыççăн Александр Борисов аслă матрос контракт йĕркипе службăна малалла тăсасса шансах тăратпăр эпир. Ун евĕр ĕçчен те пултаруллă каччăсем Тинĕс-çар флотне питĕ кирлĕ.
Çырăва вĕçленĕ май, сире çирĕп сывлăхпа тулли телей сунатăп, хисеплĕ Вера Васильевна. Ывăлăрăн службăри пархатарлă çитĕнĕвĕсем сире пурнăçри йывăрлăхсене çĕнтерсе пыма хавхалантарччăр».
РЕДАКЦИРЕН. Карап командирĕ Тав çырăвĕн копине Патăрьелпе Шăмăршă районĕсен çар комиссариатне те ярса панă, ăна вырăнти хаçатра пичетлесе кăларма ыйтнă. Çак сĕнĕве пурнăçланă май, эпир те Вера Васильевнăна ырлăх-сывлăх сунатпăр. Эсир салтака юрăхлă ывăл ÿстерсе çитĕнтерни, вăл службăра чăваш ятне çÿлте тытни питĕ савăнтарать.