25 июля 2009 г.
Шăмăршă ял поселенийĕнчи депутатсен Пухăвĕн 2009 çулхи мартăн 11-мĕшĕнчи йышăнăвĕнчен:
- Килти выльăх-чĕрлĕхе урамра, газонсем çинче, нумай хваттерлĕ çуртсен картишĕнче, халăх канакан вырăнта çÿретме пачах та юрамасть.
- Çак правилăсене тÿрремĕнех пăснă çынсем пирки пуçарнă ĕçсене Шăмăршă районĕнчи административлă комиссире пăхса тухма ярса памалла.
ШĂМĂРШĂ ял поселенийĕн аслă специалисчĕнчен Михаил Вашуркинран чи курайман тăшманĕ пирки ыйтсан, тÿрех качакана асăнать. Мăйракаллă, вăрăм сухаллă çак выльăх мĕн чухлĕ тарăхтарман-ши ăна; Ăна çеç-и – ял поселенийĕн администрацийĕнче ĕçлекен кашни çын качакасемпе «çапăçа-çапăçа» халтан кайнă ĕнтĕ. Ирĕкре çÿрекен мăйракаллă «шуйттансем» йывăçсемпе тĕмсене кăшлаççĕ, чечек клумбисене сиен кÿреççĕ, карта урлă çăмăллăнах сиксе каçса пахча çимĕçе тымарĕпех тĕп тăваççĕ...
Аптăранă енне, ял поселенийĕнче ĕçлекенсем качакасене хăваласа тытса картишне хупса та пăхнă. Хуçисем çав кунах тупăннă: тархасла-тархасла хăйсен выльăхĕсене парса яма ыйтнă. Парса янă, анчах милици ĕçченĕсемпе пĕрле малтан акт çырнă. Район администрацийĕ çумĕнчи административлă комисси качакасене ирĕкре çÿретнĕшĕн штраф тÿлеттерни чарусăр выльăх хуçисене пăртак та пулин ăса кĕртĕ-ши; Шел, питех пулăшмасть пулмалла: качака эртелĕсем паян та ирĕкрех çÿреççĕ.
Индире ĕне чи хисеплĕ выльăх шутланать, теççĕ, ăна урамра ирĕккĕнех çÿреме никам та чармасть иккен. Шăмăршăра вара качака «çвяттуй» выльăха тухасшăн. Ял поселенийĕнче ĕçлекенсене хашка-хашка качака хыççăн хăваланăшăн укçа тÿлемеççĕ, вĕсен ытти ĕç те тем чухлех. Качака усракан çынсен выльăха ирĕкре çÿретме юраманнине асра тытмалла, район центрĕнчи йывăç-курăкпа чечексене сăтăр тăвас марччĕ.