05 августа 2009 г.
«ВОСХОД» СХПКра 100 гектар ырашпа 60 гектар тритикали культурине кĕске вăхăтра тата тирпейлĕ пуçтарса кĕртрĕç. Виталийпе Андрей Воробьевсем, Владимир Курносов «хир карапĕсене» тухăçлă ĕçлеттереççĕ. Хальхи вăхăтра вĕсем кĕрхи тулă уйĕнче тăрăшаççĕ, 300 гектар йышăнакан лаптăк куç умĕнчех пушанса пырать.
Комбайнсем патĕнчен йĕтем çине тырă турттарнă çĕрте Анатолий Петровпа Петр Воробьев тăрăшуллă.
Улăма çийĕнчех пухса урана хываççĕ. Çак ĕçре Валерий Псаров механизатор хастар пулнине палăртмалла. Хальлĕхе икĕ ура купаланă ĕнтĕ.
Кĕр тыррисем акма çĕр хатĕрленĕ çĕрте Николай Степанов механизатор пысăк вăй хурать.
«Ылтăн пек хаклă кунсемпе туллин усă курса вырмана йĕркеллĕ вĕçлесчĕ тесе тăрăшатпăр, - тет хуçалăх ертÿçи Михаил Самсонов. – Çулне кура тухăç начар мар, кĕр тыррисем уйрăмах савăнтараççĕ».