15 августа 2009 г.
КАХĂРЛĂ ШĂХАЛĔНЧЕ çуралса ÿснĕ Юрий Осипов милиционер формине 1994 çулта тăхăннă. Çар службинчен аслă сержант званийĕпе таврăннă, Сĕнтĕрвăрринчи вăрман техникумне пĕтернĕ çамрăка Ульяновск облаçĕнчи Чердаклы районĕн шалти ĕçсен пайĕнче тÿрех офицер должноçне ĕçлеме илнĕ. Милицин участокри уполномоченнăйĕ çĕнĕ ĕçе пысăк хастарлăхпа пуçăннă. Часах ăна кĕçĕн лейтенант звани панă. Хăйĕн тивĕçне çулран-çул тÿрĕ кăмăлпа пурнăçласа пынă çамрăк офицер, шанса панă административлă участокра право йĕркисене çирĕплетме тăрăшнă.
2002 çулта Юрий Осипов тăван района – Шăмăршăри шалти ĕçсен пайне ĕçлеме куçнă. Кунта та ăна милицин участковăй уполномоченнăйĕн должноçне шанса панă. Палтиел участокĕнчи граждансем саккунсен хÿтлĕхĕнче пурăнччăр тесе çине тăрса ĕçленĕ Юрий Леонтьевич. Тăрăшулăхĕпе пултарулăхне кура, тепĕр çулах ăна аслă участковăй пулма çирĕплетнĕ.
2004 çултанпа вăл шалти ĕçсен пайĕн начальникĕн тыл енĕпе ĕçлекен помощникĕнче вăй хурать. Пайри техника паркĕнчи автомашинăсене запас пайсемпе, çунтармалли-сĕрмелли материалсемпе тивĕçтересси, милиционер-водительсене куллен путевкăсем çырса парасси, автомашинăсен техника тĕлĕшĕнчи юсавлăхне пăхса-тĕрĕслесе рейса кăларасси, сотрудниксем валли форма обмунидированийĕ кÿрсе килесси, милици çуртне тирпейлĕ те юсавлă тытасси тата ытти те унăн тивĕçĕ. Хăйне шанса панă ĕçе çулран-çул пысăк яваплăхпа туса пырать Юрий Леонтьевич.
Служба тивĕçĕсене яланах таса чунпа тата Присяга хушнă пек пурнăçланă май, Юрий Осипова Раççей Федерацийĕн тата Чăваш Республикин Шалти ĕçсен министерствисен Хисеп грамотисемпе, «Службăра палăрнăшăн» медальпе, «Милици отличникĕ», «Служба тивĕçне чунтан парăннăшăн» знаксемпе наградăланă. Кунсăр пуçне милици майорне шалти ĕçсен пайĕн начальникĕ нумай хутчен хăйĕн приказĕпе тав тунă, укçа премийĕсемпе чысланă.