19 августа 2009 г.
ХАЛЬЛĔХЕ çăвăн юлашки уйăхĕ ăшă кунсемпе савăнтарать-ха. Анчах та кĕр çитесси, çанталăк сивĕтме пуçласси те инçех мар. Çакă чылай çынна хумхантарать: нумай хваттерлĕ çуртсене, учрежденисемпе организацисене хĕллехи тапхăрта ăшă парса тăрас ĕçе хатĕрленесси мĕнле пырать-ха; Çакăн пирки пирĕн корреспондент «Коммунальник» МУП директорĕн çумĕпе В.Ю.Кузнецовпа курса калаçнă.
– Пирĕн çинче районти вунă котельнăй шутланса тăрать, – терĕ Валерий Юрьевич. – Вĕсенчен ытларах пайĕ – район центрĕнче.
– Хальхи вăхăтра мĕнлерех шайра вĕсем; Юсавлă-и;
– Тĕпрен илсен, пурте тенĕ пекех сезона хатĕр темелле. Çу каçа алă усса ларман вĕт – ăçта кирлĕ унта юсав ĕçĕсем ирттернĕ. Район центрĕнчи «Аленушка» ача сачĕнчи, «Совхозная», «Квартальная», Культура керменĕнчи, тĕп больницăри котельнăйсем ыран тесен ыран ĕçе пуçăнма юрăхлă. «Совхозная» котельнăйĕнче кăçал икĕ хуран (котел) улăштартăмăр. Кунсăр пуçне Шăмăршăри Космовский тата Ленин урамĕсенче ăшă парса тăракан трассăсене ылмаштартăмăр.
– Валерий Юрьевич, эпĕ пĕлнĕ тăрăх хăш-пĕр ялсенчи котельнăйсем те сирĕн çинче шутланаççĕ.
– Ун пеккисем те пур. Вĕсем Виçпÿрт Шăмăршăра, Патирекре, Пуянкассинче тата Анат Чаткасра. Вĕсенчи хурансем те, ытти оборудовани те юсавлă. Халĕ Виçпÿрт Шăмăршăра тата районти тĕп больницăра котельнăйсен çивиттийĕсене улăштараççĕ.
– Апла пулсан, лару-тăру пĕтĕмпех йĕркеллĕ пек...
– Тĕрĕссипе, хăш-пĕр çĕрте системăсене çумалли, газ пусăмне тепĕр хут тĕрĕслемелли çеç юлнă. Шыв тĕлĕшпе чăрмавсем çук, вăл котельнăйсене пырса тăрассине автоматизациленĕ, ятарлă приборсем вырнаçтарнă. Специалистсем тĕлĕшпе те чăрмав çук. Оператор пулса ĕçлеме пĕлтĕр вăй хунă çынсемех – вĕсем хĕрĕхĕн – кăмăл турĕç.
Нумай хваттерлĕ çуртсен подъезчĕсене те хĕле хатĕрлес тĕлĕшпе ĕçлетпĕр, алăксене, чÿречесене ăшă тытмалла тăватпăр. Пĕр сăмахпа, шăмăршăсене сивĕ хĕл хăратмĕ.