29 августа 2009 г.
1966 ÇУЛХИ август уйăхĕнче Шупашкарти педагогика институчĕн физикăпа педагогика кафедрин пĕлтерÿсен хăми умĕнче абитуриентсен пысăк ушкăнĕ кĕпĕрленсе тăнă. Студентсен йышне илнине çирĕплетекен списокра кашниех хăйĕн хушаматне шыранă. Калама кăна: физика уйрăмĕнче пĕр вырăншăн пилĕк çамрăк кĕрешнĕ-çке-ха, вĕренме кĕмелли экзаменсенче кашниех лайăх пĕлÿпе палăрма тăрăшнă. Ирçе Тĕкки йĕкĕчĕ списокра хăйĕн хушаматне курсан, паллах, питĕ савăннă.
Геннадий Бабочкин вĕренĕве пысăк хастарлăхпа пуçăннă. Института Шăмăршăри вăтам шкулти пекех лайăх паллăсемпе вĕренсе пынă вăл. Пуçаруллă йĕкĕте часах группа старостине суйланă.
Хĕрÿ вĕренÿре çулсем сисĕнмесĕрех иртнĕ. 1970 çулта физика преподавателĕн дипломне илсен çамрăк специалиста тăван района – Васанти вăтам шкула ĕçлеме янă.
Юратнă ĕçре малтанхи кунсенчен пуçласах Геннадий Пантелеевич пысăк тăрăшулăх кăтартнă. Ăна, ăшă кăмăллă, çав вăхăтрах хăйĕнчен те, вĕренекенсенчен те çирĕп ыйтакан çамрăк учителе, ачасем те, вĕсен ашшĕ-амăшĕсем те, пĕрле ĕçлекенсем те питĕ хисепленĕ. Педагогика отраслĕн хаçат-журналĕнче çырса кăтартнă вĕрентÿ ĕçĕнчи çĕнĕлĕхсемпе те кăсăкланса паллашнă вăл, вĕсене хăйĕн урокĕсене кĕртсе пынă. Физика часах ачасен юратнă предмечĕсенчен пĕри пулса тăнă.
Халăх вĕрентĕвĕн районти пайĕн заведующийĕ Х.К.Яковлев Васан çынни пулнă май, тăван шкула час-часах кĕре-кĕре тухнă, учительсемпе канашланă, вĕсен ĕç-хĕлĕпе кăсăкланнă. Пĕрлех Геннадий Пантелеевичпа та тĕл пулса калаçнă, урокĕсене итлесе, унăн ĕç меслечĕсемпе паллашнă. Ку ахальтен пулман – пайра инспектор должноçĕнче ĕçлеме пултаруллă, педагогсемпе пĕр чĕлхе тупма пултаракан çамрăк специалист кирлĕ пулнă.
1971 çулта Г.П.Бабочкин халăх вĕрентĕвĕн районти пайĕн инспекторĕнче ĕçлеме пуçланă. Физикăпа математика циклĕсене, ытти предметсене пысăк тимлĕх уйăрнă Геннадий Пантелеевич, педагогсене çĕнĕ методикăсемпе ĕçлеме вĕрентнĕ, май килнĕ таран пулăшнă. Тепĕр инспекторпа – Р.У.Ракиповпа пĕр чĕлхе тупни пайри инспекци ĕç-хĕлне ăнăçлă илсе пыма май панă. Çамрăк инспекторсем вăй-халĕсене шеллемесĕр тăрăшнă, нихăçан та сехет çине пăхса ĕçлемен.
1977-2005 çулсенче Г.П.Бабочкин халăх вĕрентĕвĕн районти пайĕн заведующийĕнче вăй хунă. Ку должноçра пĕр улшăнми 28 çул ĕçлесе, вĕрентÿпе воспитани ĕçĕнче, учрежденисен пурлăх никĕсне çирĕплетессинче сисĕмлĕ тÿпе хывнă Геннадий Пантелеевич. Çак çулсенче унчченхи кивĕ шкул çурчĕсем вырăнне çĕннисене туса хута янă. Хальхи шкулсемпе ача сачĕсен 90 процентне Г.П.Бабочкин заведующире вăй хунă тапхăрта çĕкленĕ. Учрежденисене пурне те çут çанталăк газĕпе хутса ăшăтмалла тунă. Вĕрентÿ учрежденийĕсем финанспа экономикăн çĕнĕ механизмĕсемпе ĕçлесси çине куçнă, шкулсен бюджет укçи-тенкин нормативĕсене ачасен шутне тĕпе хурса никĕсленĕ. Кадрсен ыйтăвĕсемпе те тимлĕн ĕçленĕ заведующи, çав вăхăтрах çирĕп принциплăх кăтартнă. Аслă пĕлÿллĕ педагогсен шучĕ 20 процент таран ÿснĕ.
2005 çултанпа Геннадий Пантеллевич райадминистрацин вĕрентÿ, çамрăксен политики тата культура пайĕнче тĕп специалист-эксперт должноçĕнче ĕçлет. Çак ĕçре те вăл тÿрĕ кăмăлпа, пысăк яваплăхпа тăрăшать, руководительсен хушăвĕсене вăхăтра тата тĕплĕн пурнăçлать. Г.П.Бабочкин – районти кадет юхăмĕн тата шкулсенче ют чĕлхесене тарăннăн вĕрентес ĕç пуçаруçисенчен пĕри.
Ыттисене яланах ырă сунакан пултаруллă педагога тата организатора районта лайăх пĕлеççĕ, тивĕçлипе хисеплеççĕ. Учительсем ăна професси ăсталăхĕшĕн, чун илемлĕхĕшĕн пысăк сума хураççĕ.
Вĕрентÿ отраслĕнчи пархатарлă ĕçшĕн Г.П.Бабочкина «Халăх çут ĕç отличникĕ» знакпа, Чăваш Республикин Вĕрентÿ министерствин, район администрацийĕн Хисеп грамотисемпе наградăланă. 1977 çулта ăна «Чăваш Республикин тава тивĕçлĕ учителĕ» хисеплĕ ят парса чысланă.
Мăшăрĕпе, Тамара Михайловнăпа, икĕ хĕр ÿстерсе çитĕнтернĕ, аслă пĕлÿ парса пурнăç çулĕ çине кăларнă. Асли, Алена, Чăваш педагогика тата Питĕрти политехника университечĕсенчен вĕренсе тухнăскер, Шупашкарти Калинин районĕн администрацийĕнче бухгалтер пулса ĕçлет. Кĕçĕнни, Татьяна, Чăваш патшалăх университечĕн медицина факультетне пĕтернĕскер, Шупашкар хулин больницинче врач-терапевтра тăрăшать. Юратнă мăнукĕ, Дима, кукашшĕпе кукамăшне пысăк савăнăç кÿрсе тăрать.
Августăн 29-мĕшĕнче Г.П. Бабочкин 60 çул тултарчĕ. Унăн юратнă мăшăрĕн те çак кунсенче юбилей пулчĕ – çуралнăранпа 55 çул çитнине палăртрĕ. Тамара Михайловна Шăмăршăри вăтам шкулта ачасене 30 çул ытла биологи вĕрентет. Вăл руководитель пулнă 11 «Б» класран кăçал 4 медалист вĕренсе тухнă.
Геннадий Пантелеевичпа Тамара Михайловнăна чаплă юбилей ячĕпе ăшшăн саламлатпăр, çирĕп сывлăхпа тулли телей сунатпăр.