19 сентября 2009 г.
ÇАК кунсенче Çĕнĕ Шупашкарти историпе краеведени музейĕнче Чăваш Енри паллă художник, пирĕн районти Пуянкасси ялĕнче çуралса ÿснĕ Юрий Алексеев ÿкерчĕкĕсен выставки уçăлнă, ăна «Юрату философийĕ» ят панă.
Художник çак выставкăна хăйĕн юратнă арăмĕ Нелли Владимировна çуралнăранпа 55 çул тултарнине халалланă.
Ытлари кун выставкăра Юрий Михайловичăн ентешĕсем – пуянкассисем пулса курнă. Ял поселенийĕн пуçлăхне В.Алексеева, ветерансен канашĕн председательне Л.Антонована, Шăмăршăри вăтам шкулти истори учительне Е.Муромцевана, ялти культура ĕçченĕсене музей сотрудникĕсем çăкăр-тăварпа кĕтсе илнĕ.
Ентешсем художник ÿкерчĕкĕсене пысăк хак панă, çакăн пек выставкăна тăван ялта та ирттерме сĕннĕ. «Ахаяс» фольклор ушкăнĕ вара выставкăна килнисене Шăмăршă тăрăхĕнчи юрă-ташăпа савăнтарнă.