26 сентября 2009 г.
РАЙОНТА хăйсен ĕçне нумай çул хушши юратса та профессилле ăсталăхпа туса пыракан воспитательсем чылай. Шăмăршăри «Аленушка» ача садĕнче вăй хуракан Х. Воробьевапа В.Курамшина та вĕсен шутне кĕреççĕ. Христина Ивановна воспитатель должноçĕнче 32 çул ĕçлет, Вера Ивановна – 30 çул. Хăйсен ĕçĕнче вĕсем яланах лайăхпа палăрса тăраççĕ. Ачасемпе тимлĕ пулнăшăн, вĕрентÿпе воспитани ĕçĕнчи хастарлăхшăн пĕртăвансене ашшĕ-амăшĕсем те, коллективра та хисеплеççĕ.
– Христина Ивановнăпа Вера Ивановнăна эпĕ чылай çул пĕлетĕп, - каласа пачĕ райадминистрацин вĕрентÿпе çамрăксен политики тата культура пайĕн шкул умĕнхи пĕлÿ парас енĕпе ĕçлекен методисчĕ Л.Сабанова. – Воспитательсем хăйсен тивĕçне яланах тÿрĕ кăмăлпа пурнăçлаççĕ, методика пĕрлешĕвĕн ĕçĕнче те хастар. Вĕсем районти воспитательсем умĕнче пĕлтĕр тĕрлĕ темăпа кăтартуллă уçă занятисем ирттерчĕç. Тулли содержаниллĕ, çÿллĕ методика шайĕнчи занятисене – вĕсем хăваран пĕчĕк карçынккасем авассипе тата юмахсен тĕнчипе çыхăннă – пурте кăмăллăн йышăнчĕç.
В.Курамшинапа Х.Воробьева пĕр группăпа ĕçлеççĕ. Пĕртăвансем кăçал май уйăхĕнче выпускной ушкăна вĕрентсе кăларса чи пĕчĕккисен – 3-4 çулти ачасен группине йышăннă. Çак ушкăнпа та тимлĕн ĕçлесе пыраççĕ пĕртăван воспитательсем.
Вĕрентÿпе воспитани ĕçĕнчи ÿсĕмсемшĕн Х.Воробьевапа В.Курамшинана Чăваш Республикин Вĕрентÿ министерствин тата районти вĕрентÿ пайĕн Хисеп грамотисемпе наградăланă.