30 сентября 2009 г.
КАРАПАЙ ШĂМĂРШĂРИ пĕтĕмĕшле вăтам пĕлÿ паракан шкулта çĕнĕ вĕренÿ çулĕн пĕрремĕш кунĕсенчех спорт мероприятийĕсем пуçланчĕç. Кăçалхи ылтăн кĕркуннен янкăр кунĕсем ачасен кăмăлĕсене уçсах пычĕç. Физкультура учителĕсем И.П.Сабаевпа В.В.Столяров пĕр ăшă куна та сая ярас темерĕç, шкулта тăтăшах масăллă спорт ăмăртăвĕсем йĕркелерĕç.
Акă, сентябрĕн 12-мĕшĕнче шкулта «Эпĕ – велосипедист» конкурс иртрĕ. Велосипедистсем чылайăн пухăнчĕç. Мĕн тĕрлĕ велосипед çук-ши кунта; Конкурс ирттерме милицин ГИБДД уйрăмĕн инспекторĕ Ф.Марков та хутшăнчĕ. Ку конкурсра Анна Кондратьева, Артем Старшов тата Максим Иванов вĕренекенсем палăрчĕç.
Сентябрĕн 20-мĕшĕнче вара Карапай Шăмăршă ял поселенийĕн çамрăкĕсем хушшинче «Наци кросĕ-2009» чупу иртрĕ. Çак ăмăртăва шкул ачисем те йышлăн хутшăнчĕç, лайăх результатсемпе палăрчĕç.
Ял поселенийĕн пуçлăхĕ В.В.Денисов çĕнтерÿçĕсене грамотăсем парса чысларĕ, спортра ăнăçу сунчĕ.