03 октября 2009 г.
ЧУЛХУЛА облаçĕнчи вăтам шкулăн выпускной класĕнче вĕреннĕ вăхăтрах Ольга Малинина педагогика институтне кĕресси пирки ĕмĕтленме пуçланă. 1987 çулта вăл вăтам шкула кĕмĕл медальпе пĕтернĕ, Чулхулари пединститутăн математика факультетне кайса кĕнĕ. Ăна часах вĕренÿ группин старости пулма çирĕплетнĕ, институтри студентсен совечĕн членне суйланă. Вĕренÿре кăна мар, тĕрлĕ обществăлла ĕçсенче те Оля пысăк хастарлăхпа палăрнă. Виççĕмĕш курсра вĕреннĕ чухне вырăс хĕрĕ сăпайлă чăваш студенчĕпе – пединститута Шăмăршă районĕнчи Чукалтан вĕренме килнĕ Александр Еремеевпа паллашнă.
1992 çулта пĕр-пĕрне килĕштерекен çамрăксем пĕр çемьене пĕрлешнĕ, институт пĕтерсен Чукалти вăтам шкула ĕçлеме килнĕ.
Институтран хĕрлĕ дипломпа вĕренсе тухнă О.М. Еремеева шкулта математика вĕрентме пуçланă. Пуçаруллă учительницăна часах директорăн воспитани енĕпе ĕçлекен заместителĕ пулма çирĕплетнĕ.
Çак ĕçе те пысăк хастарлăхпа пуçăннă Ольга Михайловна. Чукал шкулĕнче вĕренекенсем районти тата республикăри тĕрлĕ мероприятисене тăтăшах хутшăннă, вĕсенче Дипломсемпе призсене тивĕçнĕ. Шкулти ачасен «СоМиС» организацийĕ те районта кăна мар, республикăри фестивальсенче те лайăхпа палăрнă. «Зарницăпа» «Орленок» районти, республикăри çар вăййисенче призлă вырăнсене йышăнса пынă.
Ольга Михайловна математика учителĕн ăсталăхне те ÿстерсех пынă. 2006 çулта вăл аслă квалификациллĕ учитель пулса тăнă.
Пĕрлех конкурссене те хастар хутшăннă. Учительсен 1995 çулта иртнĕ районти конкурсĕнче О.М.Еремеева иккĕмĕш вырăн çĕнсе илнĕ. «Çулталăкри учитель – 1999» республика конкурсĕнче 28 учитель хушшинче финала тухса тăваттăмĕш вырăн йышăннă. 2003 çулта методика идейисен республикăри фестивалĕнче те лайăхпа палăрнă. Элĕкри вăтам шкулта Ольга Михайловна компьютер технологийĕсемпе анлăн усă курса ирттернĕ уçă урока сумлă комисси пĕрремĕш вырăн парса хакланă. 2008-2009 вĕренÿ çулĕнче иртнĕ Пĕтĕм Раççейри методика идейисен заочнăй фестивальне те пултаруллă математик паха содержаниллĕ материалсем тăратнă. Унăн ĕçне комисси Раççейри вĕрентÿ отраслĕн сайтне вырнаçтарнă, автора Дипломпа чысланă.
2006 çулхи апрельте О.М.Еремеевана шкул директорĕ пулма уйăрса лартнă. Çак должноçра та яваплăхпа ĕçлесе пыма тăрăшать вăл.
Ĕçри хастарлăхшăн Ольга Михайловнана Чăваш Республикин Вĕрентÿ тата çамрăксен политикин министерствин Хисеп грамотипе наградăланă.