03 октября 2009 г.
АЧАСЕН пĕлÿ шайĕ мĕнлерех пуласси, паллах, преподавателĕн педагогика пултарулăхĕнчен тата кабинета вĕренÿ пособийĕсен кăтартуллă материалĕсемпе мĕнлерех пуянлатнинчен нумай килет. Шăмăршăри вăтам шкулта ОБЖ предмечĕпе вĕрентекен Ю.Ф. Ермолаев – хăйĕн ĕçне юратса пурнăçлакан опытлă преподаватель. Çамрăк учителĕн вĕренекенĕсен пĕлÿ шайĕ юлашки 3 çулта 80 процентран 88 процента çити пысăкланнă. 2008 çулта, сăмахран, районти ОБЖ олимпиадинче унăн вĕренекенĕсенчен 3-шĕ – пĕрремĕш, 3-шĕ – иккĕмĕш вырăнсем çĕнсе илнĕ. 2009 çулта вара пĕр вĕренекен республикăри олимпиадăра пĕрремĕш вырăна тухнă.
Юрий Федорович, хăй вăхăтĕнче çар службинче пиçĕхнĕскер, шкулти «Паттăрлăх» патриотла клубăн ĕç-хĕлне пĕлсе те питĕ интереслĕ йĕркелесе пырать. Çак клубăн руководителĕ пулнă май, вăл унăн программине те тĕрлĕ енлĕ туса хатĕрленĕ. Çар клубĕн занятийĕсене вĕренекенсем хаваспах çÿреççĕ. Ку пĕрлешÿ вĕренекенсене Тăван çĕршыва юратма, аслисене хисепе хума, паттăрсене, вăрçă ветеранĕсене яланах асра тытса пурăнма вĕрентет. Яшсем вара çар службине тивĕçлипе хатĕрленсе кайма хăнăхаççĕ. «Çар службинче пуласси, Тăван çĕршыва хÿтĕлесси – кашни арçыннăн хисеплĕ тивĕçĕ», – тет час-часах занятисенче клуб ертÿçи.
Ю.Ф.Ермолаев тăрăшнипе вĕренекенсем аслă ăрури çынсемпе, вăрçă ветеранĕсемпе, тыл ĕçченĕсемпе тĕл пулаççĕ. Салтаксемпе офицерсен фронтри паттăрлăхĕ, Аслă Çĕнтерĕве çывхартма пулăшнă çынсен ĕçри хастарлăхĕ çинчен каласа панине вĕренекенсем кăсăкланса та питĕ хумханса итлеççĕ. Презентацисемпе тĕрлĕ конкурссем вĕренекенсенче историлле астăвăм, кăмăл-сипет, тăван тавралăх культурин шайне ÿстерме пулăшаççĕ.
Клуб членĕсем республикăри çамрăк армеецсен мероприятийĕсенче Дипломсене тивĕçеççĕ. 2007 çулта вĕсене I степеньлĕ, 2008 çулта I, II, III степеньлĕ Дипломсем парса чысланă. Республикăри çамрăк армеецсен «Зарница» команди радиостанципе ĕçлес тĕлĕшпе I степеньлĕ Диплом илнĕ.
Юрий Федорович – районти физкультура тата ОБЖ преподавателĕсен ассоциацийĕн председателĕ. Методика пĕрлешĕвĕн ĕç планне вăл тĕплĕн туса хатĕрлет, вăл пурнăçа кĕрсе пытăр тесе нумай тăрăшать. Вăл уçă уроксем парать, мастер-классем йĕркелет. Унăн çÿллĕ методика шайĕнчи урокĕсене районти учительсем яланах кăмăллăн йышăнаççĕ.
Пархатарлă ĕçшĕн Ю.Ф.Ермолаева Чăваш Республикин Вĕрентÿ тата çамрăксен политикин Хисеп грамотипе чысланă.