03 октября 2009 г.
А.М.ИЧАНКИН Шăмăршăри ачасемпе çамрăксен спорт шкулĕнче самбо тата дзюдо секцийĕсене ертсе пырать. Александр Михайлович хăйĕн тивĕçне çулран-çул творчествăлла хавхаланупа пурнăçлать.
Яшсемпе кашнийĕнпех уйрăммăн ĕçленĕ, тренировка йывăрлăхĕсене пĕлсе шайлаштарса пынă май, А.М. Ичанкинăн воспитанникĕсен результачĕсем çÿллĕ шайра пыраççĕ. Сăмахран, юлашки 3 çул хушшинче вăл массăллă разрядлă 54 спортсмен, пĕрремĕш разрядлă 11 спортсмен хатĕрленĕ. Пултаруллă тренер-преподавателĕн воспитанникĕсенчен 3-шĕ – Раççей спорт мастерĕн кандидачĕ, пĕри – Чăваш Республикин самбо кĕрешĕвĕн пĕрлештернĕ командин членĕ. 2006-2009 çулсенче унăн воспитанникĕсенчен 5-шĕ Чăваш Республикинче кĕрешсе мала тухассишĕн пынă ăмăртусенче («Кĕрешÿ») çĕнтерÿçĕсем пулса тăнă. Александр Михайлович воспитанникĕсене хăйĕн спортри ырă тĕслĕхĕпе те хавхалантарать. Вăл самбо мелĕпе кĕрешсе темиçе хутчен те республика Чемпионачĕсенче çĕнтерÿçĕ тата призер пулнă.
А.М.Ичанкин тренер-преподавательсемпе физкультура учителĕсен районти методика пĕрлешĕвĕн ĕçĕнче те пысăк активлăхпа палăрса тăрать, мастер-классем кăтартать. Александр Михайлович пуçарулăхĕпе юлашки 5 çул хушшинче Раççей Геройне Олег Долгова асăнса республика турнирĕ ирттересси йăлана кĕчĕ.
Тренер-преподавателĕн выпускникĕсем çулленех аслă вĕренÿ заведенисен физкультура факультетне вĕренме кĕреççĕ. Чылайăшĕ кайран та спортран уйрăлмасть. А. Воробьев (Шăмăршă каччи) Хусанти çар училищинче вĕреннĕ вăхăтра Атăлçи çар округĕнче темиçе хутчен те чемпион пулнă. Кайран вара, лейтенант званине илсен, Раççей Хĕçпăшаллă Вăйĕсен иккĕмĕш призерĕ тата çарти нумай енлĕ кĕрешÿсем енĕпе Раççей спорт мастерĕ пулса тăнă. А.М.Ичанкин патĕнче спорт ăсталăхне илнĕ 3 спортсмен дзюдо енĕпе Раççей спорт мастерĕн хисеплĕ ятне çĕнсе илнĕ.
Хăйĕн ĕçне яланах юратса тата пысăк ăсталăхпа пурнăçланăшăн Александр Михайловича Чăваш Республикин вĕрентÿ тата çамрăксен политикин министерствин Хисеп грамотине парса чысланă.