03 октября 2009 г.
ВĔРЕНТŸ ĕçĕнчи çĕнĕ технологисемпе ĕçлесе пыракан, яланах творчествăлла шырав патнелле ăнтăлакан учительсем ĕçре курăмлă ÿсĕмсем тăваççĕ. Палтиелĕнчи вăтам шкулти А.М.Емдиханована та вĕсен шутне кĕртме пулать. Вăл ачасене тутар чĕлхипе литературине вĕрентет. Хăйĕн çÿллĕ методика шайĕнчи урокĕсенче Асия Миннехановна ачасене пĕрлех çыннăн пурнăçри пĕлтерĕшне ăнланма пулăшать, илемлĕ чунлă пулма, тăван тавралăха хаклама, аслисене хисеплеме те хăнăхтарса пырать. Чылай çул ĕçлесе ĕçре пысăк опыт пухнă учительницăн вĕренекенĕсен творчество ĕçĕсенче ачан кăмăл-сипет шайĕ, литература аталанăвĕпе тĕнче курăмĕ ÿссе пыни курăнать.
А.М.Емдиханован вĕренекенĕсем кашни çулах районти тата республикăри олимпиадăсенче призлă вырăнсем йышăнса пыраççĕ, иртнĕ вĕренÿ çулĕнче унăн вĕренекенĕсем тутар чĕлхин республикăри олимпиадинче иккĕмĕш тата виççĕмĕш вырăнсем йышăннă. 2008 çулта Хусанта иртнĕ тутар чĕлхипе литературин регионсем хушшинчи олимпиадинче унăн вĕренекенĕ тăваттăмĕш пулнă. Районти наукăпа практика конференцийĕнче те призлă вырăнсене тухаççĕ.
Асия Миннехановна хăйĕн педагогикăри ăсталăхне ÿстерсех пырать. Уçă уроксенче ытти учительсене хăйĕн ĕç опычĕпе паллаштарать. Педагогика темипе Тутарстанра пичетленекен хаçат-журналта те курма пулать А.М.Емдиханован паха содержаниллĕ, тарăн шухăшлă статйисене. Вăл çырса хатĕрленĕ «Тутар чĕлхипе литература урокĕсенче вĕренекенсен творчество ăсталăхне аталантарасси» методикăлла ĕç районти тутар чĕлхипе литература учителĕсен вĕрентÿ пособийĕ пулса тăчĕ.
Асия Миннехановна обществăлла ĕçсенче те пысăк активлăх кăтартать, тутар чĕлхипе литература вĕрентекенсен методика пĕрлешĕвне ертсе пырать.
А.М.Емдиханована вĕренекенсем юратаççĕ, ĕçтешĕсем хисеплеççĕ. Ĕçчен те пултаруллă учительница ял-йышра та ят-сумлă. Вăл шкулти, ялти обществăлла ĕçсенчен те пăрăнмасть.
Вĕрентÿпе воспитани ĕçĕнчи çитĕнÿсемшĕн Асия Миннехановна Раççей Федерацийĕн Вĕрентÿпе наука министерствин, Чăваш Республикин Вĕрентÿ тата çамрăксен политикин министерствин Хисеп грамотисене, «Çутĕç отличникĕ» знака тивĕçнĕ.