17 октября 2009 г.
ЯЛТА çерçи выçă вилмест тесе ваттисем питĕ тĕрĕс каланă. Ÿркенмен çын хăй валли ĕç тупатех, тупăшне те курать.
Районти халăха ĕçпе тивĕçтерекен центр кăçал ĕçсĕр тăрса юлнă икĕ ял çыннине харпăр-хăй ĕçне йĕркелесе яма пулăшрĕ. Мăйракаллă шултра выльăхсем ĕрчетес тĕлĕшпе туса хатĕрленĕ бизнес-проекта комисси чи ăнăçли тесе шутларĕ.
Халăха ĕçпе тивĕçтерес енĕпе республикăра хушма программа пурри çинчен пĕлсенех, Патирекри Ферид Каленов хăйĕн ĕçне йĕркелеме тĕллев лартать. Ферид Абдуллович – хĕрĕх çиччĕри вăй питти арçын, маларах агроном специальноçне илнĕ. «Искра» СХПКра водительте, унтан ферма заведующийĕнче вăй хунă. Ĕçсĕр тăрса юлсан та аллине усман, килти хушма хуçалăхне аталантарма тăрăшнă. Кăçалхи июнĕн 25-мĕшĕнче Ф.Каленов хресчен (фермер) хуçалăхне регистрациленĕ.
Ферид Абдуллович хăйне уйăрса панă çĕр çинче çĕр улми, сахăр чĕкĕнтĕрĕ, утă туса илет, выльăх-чĕрлĕх ĕрчетет. Бизнес-проектпа килĕшÿллĕн, мăйракаллă шултра выльăхсен йышне ÿстерме палăртать. Пирĕн центр урлă 58800 тенкĕ субсиди илсе, фермер ăратлă пăрусем туянчĕ. Выльăх апачĕ çителĕклĕ хатĕрленĕ. Тăкаксем пирки ĕçпе тивĕçтерекен центра çийĕнчех çирĕплетÿ докуменчĕсем тăратать.
Ферид Абдуллович продукци хăйхаклăхне йÿнеçтерессишĕн, тупăш ытларах илессишĕн тăрăшать. Чăн-чăн хуçан çапла пулмалла та. Унăн тĕслĕхĕ ĕçсĕр юлнă ытти çынсене те харпăр-хăй ĕçне йĕркелесе яма хавхалантарасса шанас килет.