17 октября 2009 г.
ÇĔНĔ ШĂМĂРШĂРИ Олег Кудряшов вăтам шкул пĕтерсен ăçта вĕренме каймалли пирки малтанах пĕлсе тăнă. Унăн ашшĕ – Валерий Иванович – районта хисеплĕ милици офицерĕсенчен пĕри пулнă. Ашшĕн ырă тĕслĕхĕпе хавхаланса, Олег та хулпуççи çине çăлтăрлă пакун çакма ĕмĕтленнĕ.
Шăмăршăри вăтам шкултан ăнăçлă вĕренсе тухсан, 1993 çулта, Олег Кудряшов Раççей Шалти ĕçсен министерствин Уфари юридици институтне вĕренме кĕнĕ. 1997 çулта аслă пĕлÿллĕ юрист дипломне илсен ăна Шăмăршă районĕнчи шалти ĕçсен пайне ĕçлеме янă.
Тăван районта çамрăк лейтенант экономика преступленийĕсемпе кĕрешекен инспектор должноçне йышăннă. Каярахпа Олег Валерьевич потребительсен рынокĕн инспекторĕ, участковăй уполномоченнăй, дознаватель пулнă.
Çулран-çул ăнăçлă ĕçлесе пынă май, 2009 çулхи июньте ăна милицин участковăй уполномоченнăйĕсен уйрăмĕн начальникĕ пулма çирĕплетнĕ. Районти 10 участковăй ĕç-хĕлĕшĕн яваплă халĕ милици капитанĕ. Вĕсене шанса панă кашни административлă участокра право йĕркисем хуçаланччăр, граждансем хăйсене саккунсен хÿтлĕхĕнче пулнине туйччăр тесе тимлесси унăн тивĕçĕ пулса тăрать.
Йĕрке хуралĕнчи тăрăшулăхшăн Олег Кудряшова III степеньлĕ «За отличие в службе» медальпе наградăланă. Кунсăр пуçне ăна пай начальникĕ хăйĕн приказĕпе темиçе хутчен тав тунă.