21 октября 2009 г.
ШĂМĂРШĂРА пурăнакан В.Шуряков кире спорчĕпе çамрăк чухнех туслашнă та, унран халĕ те уйрăлмасть. Спортăн çак тĕсĕнче вăл тĕнче тата Европа шайĕнчи ÿсĕмсем тăвать. Владимир Петрович кăçал апрельте Хусан хулинче иртнĕ Тĕнче Чемпионатĕнче вăрăм циклпа пынă ăмăртура тĕнче чемпионĕн ятне çĕнсе илнĕччĕ. Пĕлтĕр Архангельск хулинче пулнă Европа Чемпионатĕнче иккĕмĕш призер пулнăччĕ.
Çак кунсенче калех савăнăçлă хыпар пĕлтĕмĕр. В.Шуряков Киров хулинче иртнĕ Европа Чемпионатĕнче Европа чемпионĕ, Тĕнче Чемпионатĕнче тĕнче чемпионĕ пулса тăнă. Пирĕн ентеше ылтăн медальсем парса чысланă. Пысăк çитĕнÿсем тунă ятпа пултаруллă ентешĕмĕре ăшшăн саламлатпăр, спортра малашне те çитĕнÿсем сунатпăр.
Çак сумлă Чемпионатсене хутшăнма спонсор пулăшăвĕ панăшăн В.Шуряков Шăмăршăри Сергей Галкин предпринимателе район хаçачĕ урлă чĕререн тав тăвать, çирĕп сывлăх, ĕçĕнче ăнăçу сунать.