24 октября 2009 г.
«ВĂРЛĂХ туса илесси çинчен» Федераллă саккунăн 25-мĕш статйипе килĕшÿллĕн, вăрлăх туса илекенсен (вĕсен шутне фермерсем те кĕреççĕ) туса илнĕ вăрлăхăн пахалăхне тĕрĕслеттермесĕр акма юрамасть. Шел пулин те, çакна фермерсем çеç мар, хăш-пĕр хуçалăх ертÿçисем те ăнлансах каймаççĕ. Уйрăмах фермерсем вăрлăх пахалăхне тĕрĕслеттерме тăрăшмаççĕ. Пахалăха тĕрĕслемесен тата кондицие ларман вăрлăхпа акнă хирсемшĕн патшалăх малашне субсиди памасть, калчасем çанталăк пăтăрмахĕсене пула сиенленсен те пулăшу кĕтсе илеймеççĕ. Çакна палăртсах хăварас килет: сиенленнĕ калчасене «Россельхознадзортан» тĕрĕслеме килсен чи малтан мĕнле пахалăхлă вăрлăхпа акнине пăхаççĕ.
Кăçалхи кĕркунне районта кĕрхи тырăсен вăрлăхĕсене 9719 центнер тĕрĕслеттернĕ, пурĕ 2642 гектар кĕрхи тулă, 468 гектар ыраш, 405 гектар тритикали акса хăварнă.
Мĕнле вăрлăхпа акнă-ха хуçалăхсемпе фермерсем; Кондицие ларни 6534 центнер (67 проц.), ларманни 3185 центнер (33 проц.) шутланнă.
Çапах та савăнтараканни те пур: районта çамрăк вăрлăхсем çине ытларах тимлĕх уйăрма тытăнчĕç. Пысăк репродукциллĕ вăрлăхсем 7554 центнер (77 проц.), массăллă репродукциллисем 16,5 процент пулнă.
Кунта уйрăмах «Агросервис» ООО ертÿçине А.В.Максимова ырăпа асăнмалла. Вăл тăрăшнипе кăçал Чăваш ял хуçалăх наука тĕпчев институчĕнчен пысăк тухăç паракан малашлăхлă çĕнĕ сортсем туяннă. «Агросервис» ОООра çитес çул кĕр тыррисен элита сорчĕсене кăна акасшăн, çурхи тырăсен вăрлăхĕсене те тĕпрен çĕнетме палăртаççĕ.