28 октября 2009 г.
ШĂМĂРШĂРИ Валентина Мулякова почтальон ĕçне пĕчĕкренех килĕштернĕ. Унăн амăшĕ, Надежда Ивановна, почтальонкăра ĕçленĕ май, вăл ăна час-часах хаçат-журнал валеçме пулăшнă. Шăмăршăри вăтам шкулта аслă классенче вĕреннĕ çулсенче вара каçхи шкулта, çыхăну уйрăмĕнчи отпуска кайнă почтальонкăсем вырăнне те ĕçленĕ.
Çыхăну узелĕн начальникĕ Александра Калашникова тăрăшуллă ирçе хĕрĕн ĕç-хĕлне сăнасах тăнă. 1981 çулта пĕр почтальонка тепĕр ĕçе куçсанах вăл ăна ун вырăнне ĕçлеме илнĕ.
Валентина юратнă ĕçе пысăк хастарлăхпа пуçăннă. Шăмăршăри промышленноç комбиначĕн тата вăрман хуçалăхĕн таврашĕнчи урамсенче пурăнакансем патне вăл тĕрлĕ хаçат-журнала, çырусемпе телеграммăсене тата ыттине вăхăтра çитернĕ. Пенси укçи енĕпе те ветерансенчен ÿпкелешÿ пулман.
– Опытлă почтальонкăсем – Людмила Вазанова, Мария Исаевапа Мария Калашникова мана ĕçре пулăшсах пыратчĕç, - аса илет Валентина Ивановна. – Ку, паллах, мана хавхалантаратчĕ.
Иртнĕ ĕмĕрти 80-мĕш çулсенче изданисен хакĕ питĕ йÿнĕ пулнă май, кашни çемьере тенĕ пекех 3-4 экземпляр хаçат-журнал çырăнса илнĕ. Çавна май почтальонкăсем урамсем тăрăх куллен тăп-тулли йывăр сумкапа çÿренĕ, кунсăр пуçне сеткăра та хаçат-журнал пулнă. Почтальонкăсем, çав шутра Валентина Мулякова та, нăйкăшман, хăйсене килĕрен чунтанах кĕтнине ăнланса, вĕсем патне васканă.
Çулран-çул, кунран-кун – кĕрхи-çурхи сивĕ çумăр шăпăртатать-и, çуллахи шăрăх çунтарать-и, хĕлле куç курми çил-тăман çавăрттарать-и – Валентина Ивановна хаçат-журнала подписчиксем патне вăхăтра çитернĕ. Вĕсенчен кашнийĕнпех вăл кăмăллăн калаçнă.
Тăрăшуллă почтальонкăна ял-йышра та, Елчĕк почтамчĕн Шăмăршăри уйрăмĕн коллективĕнче те хисеплеççĕ, сума хураççĕ. Людмила Кузьмина, Антонина Леонтьева, Елена Иванова, Людмила Трофимова тата Наталья Антонова почтальонкăсемпе пĕр чĕлхе тупса ĕçлесе пырать Валентина Мулякова. Почтальонкăсем пĕр-пĕринпе килĕштерсе ĕçлени пĕрлехи ĕçре хăш-пĕр ÿсĕмсем тума май парать. Ытти изданисемпе пĕрлех, «Шăмăршă хыпарне» çырăнтарассине те манăçа хăвармаççĕ вĕсем.
Пархатарлă ĕçшĕн Валентина Мулякована Шăмăршă районĕн çыхăну узелĕн тата Елчĕк почтамчĕн администрацийĕсен Хисеп грамотисемпе наградăланă.
Мăшăрĕпе, Сергей Валентиновичпа, ывăлпа хĕр ÿстерсе çитĕнтернĕ, тивĕçлĕ воспитани парса пурнăç çулĕ çине кăларнă. Вĕсем иккĕшĕ те çемьеллĕ. Муляковсене халĕ 3 мăнук тулли савăнăç кÿрсе, пурнăçне илемлетсе тăрать.
Ноябрĕн 2-мĕшĕнче Валентина Ивановна хăйĕн черетлĕ çуралнă кунне паллă тăвать. Тăванĕсем, ĕçтешĕсем çумне хутшăнса, ăна ăшшăн саламлатпăр, çирĕп сывлăхпа тулли телей, ĕçре ăнăçу сунатпăр.