28 октября 2009 г.
«ŸРКЕНМЕН çын ăста пулнă». «Ĕç çынна илем кÿрет». «Ĕçрен ан хăра, вăл санран хăратăр». «Ĕç алă çумне çыпçăнмасть». Тата темĕн чухлĕ ваттисен сăмахĕсене аса илме пулать. Вĕсене пире мĕн ачаранах аслисем каласа вĕрентнĕ, асра тытма хушнă.
Пуянкасси ялĕнчи ветеринари участокĕнче вăй хуракан И.Семенов мĕн пĕчĕкрен ĕçе юратса ÿснĕ. Выльăх-чĕрлĕхе, кайăк-кĕшĕке юратнăран шкулта вĕреннĕ чухнех пурнăçри профессине суйласа хунă вăл. Алла диплом илсен Ваня Вăрнарти техникума ветеринари уйрăмне ăс пухма кĕнĕ. Вĕрентекенсен сăмахне тăнласа пынă вăл, хăйне килĕшекен ĕçре вĕсен вĕрентĕвĕ кирлине ăнланнă.
И.Семенов салтака кайса килнĕ хыççăн чунĕ туртнă пофессипе ĕçлеме тытăннă. Çамрăк специалист хăйне шаннă ĕçе тĕрĕс те тĕплĕн пурнăçланипе ял халăхĕ хушшинче ырă ят çĕнсе илнĕ. Ирпе-и, каçпа-и е çĕрле-и – вăл яланах васкавлă пулăшу ыйтма килнĕ çынсене пулăшма васкать. Пĕрин сысни чирленĕ, теприн ĕни пăрулаймасть, виççĕмĕшĕн сурăхĕ тăраймасть... Туххăмрах Ваньăн ăста аллисем выльăх-чĕрлĕхе ура çине тăма пулăшаççĕ. Пуянкасси ялĕнче кăна мар вăл хисепре, ăна Кахăрлă Шăхаль, Виçпÿрт Шăмăршă, Хайпăла ялĕсенче те ырă сăмахпа асăнаççĕ. Пултаруллă каччă «Колос» агрофирмăпа «Карла» фермер хуçалăхĕн выльăх-чĕрлĕхне те сăнаса тăрать.
Ялти обществăлла мероприятисене те хастар хутшăнать Ваня. Спортпа та питĕ туслă вăл. Ял каччи пулнăран, тума пĕлмен ĕç те çук пулĕ унăн. Çавăн пек маттур та пултаруллă çамрăк специалистсем пулсан, ĕçе чунтан парăннă çынсем пурăнсан ял пĕтместех, аталанса пыратех.