31 октября 2009 г.
ШĂМĂРШĂРИ Заводская урамĕнчи 40-мĕш çурт çумĕнче 25-30 çул каялла экскаваторпа пысăках мар кÿлĕ чавнă пулнă. Ку вăл, паллах, Заводская, Молодежная, Корчагин тата ытти урамсенче пурăнакансене хур-кăвакал усрассинче тата пушартан сыхланассинче пысăк пулăшу панă. Анчах та çулсем иртнĕçемĕн çак кÿлĕ юшкăнпа тулса, ăшăхланса пынă. Юлашки çулсенче вара вăл типсех ларчĕ.
Çак çивĕч ыйтупа пулăшу ыйтас тĕллевпе эпир, асăннă урамсенче пурăнакансем, нумаях пулмасть Чăваш Республикин Патшалăх Канашĕн депутачĕ, «Агросервис» ОООн генеральнăй директорĕ А.В.Максимов патне кайрăмăр. Александр Васильевич пире кăмăллăн йышăнчĕ. Пирĕн нушана тÿрех ăша хыврĕ вăл, çийĕнчех пулăшма шантарчĕ.
Çак кунсенче «Агросервис» ОООн экскаваторĕ кÿлле чавса тасатма тытăнчĕ, автомашина вара юшкăна турттарса тăчĕ. Тасатнă кÿлĕре – шурлăхлă вырăнта шыв тÿрех тулма пуçларĕ. Хальхи вăхăтра вăл туллипе пĕрех.
А.В.Максимов депутат чăннипех те халăхшăн ĕçленине эпир хамăр куçпа курса ĕнентĕмĕр.