31 октября 2009 г.
ХĔРЛĔ ВАСАН паççулккине асфальт сарнă тап-такăр çулпа вĕçтерсе çитрĕмĕр. Икĕ çул каялла Чаткаса е Упие çити пылчăк ашса утнине, çăмăл автомашина пирки ĕмĕтленме çеç пултарнине аса илетпĕр те, мĕн тери пысăк улшăнусем пулса иртнине курса чун савăнать. Çуртсене çут çанталăк газĕ ăшăтать, чылайăшĕ кухньăна шыв та кĕртнĕ.
Çирĕм ытла килĕллĕ пĕчĕк ялта ĕçчен çынсем пурăнаççĕ. Çакна выльăх-чĕрлĕх усракансен йышĕ пысăк пулни те çирĕплетет:сăвăнакан 14 ĕне тата 15 пушмак пăру, 30-а яхăн сысна, 80 сурăх, 9 лаша усраççĕ хĕрлĕвасансем. Хăшĕ-пĕри икшер ĕне те тытать. Корчагинсен, Терентьевсен, Герасимовсен картишĕсем уйрăмах тулли.
Выльăх апачĕ пирки пăшăрханмалли çук: утă çулмалли вырăнсем ытлă-çитлĕ кунта. Çĕр улми, чĕкĕнтĕр, кавăн çитĕнтереççĕ. Тырă туянас ыйту та пăшăрхантармасть: укçу пулсан сутакан тем чухлех.
Укçине вара аш-какай тата сысна çурисем сутса тăваççĕ. Кÿршĕри Тутарстанран килсе туянаççĕ. Асфальт суту-илÿре те усă кÿрет.
Ял çыннисем чаплă кил-çурт çавăраççĕ. Акă, Корчагинсен çĕнĕ çурчĕ кермен пек пысăк та çутă, темиçе пÿлĕмлĕ. Кĕлечĕсемпе витисем те çĕнĕ. Пÿртне шыв та кĕртнĕ, хаклă сĕтел-пукан туяннă.
– Фермер хуçалăхĕ йĕркелес тетĕп, – пĕлтерчĕ кил хуçи – Виталий. – Районти ĕçпе тивĕçтерекен центрпа çыхăнса бизнес-план хатĕрлерĕм. Мăйракаллă шултра выльăхсем ĕрчетме пуçласшăн. Пенсие тухиччен вăхăт пур-ха, мĕншĕн ахаль алă усса ларас; Ялта ватăлма та вăхăт çук вĕт, ĕçлес текеншĕн ĕç тем чухлех.
Тепĕр ĕмĕт те пур: Шăмăршă Акатуйĕнчи ăмăртăва хамăн урхамахпа хутшăнасшăн.