07 ноября 2009 г.
ÇИЧĔ теçетке хыçа хăварнă хыççăн çыннăн аса илмелли, пурнăçра çак тапхăрта утса тухнă кун-çул пирки пĕтĕмлетÿ тумалла сахал мар. Палтиелĕнче пурăнакан Н.Юмановăн та хăйĕн шăпине ÿпкелемели çук пулĕ.
Çакăнтах, йышлă ача-пăчаллă килте çуралса ÿснĕ вăл, çемьере чи асли пулнă. Çавна май Николайăн ачаранах хура ĕçе кÿленме тивнĕ. Аслă Отечествăлла вăрçă хыççăнхи çулсенче ялта пурнăç уйрăмах йывăр пулнă: юхăннă ял хуçалăхне ура çине тăратассишĕн пурте ырми-канми тăрăшнă, вăл шутра – ачасем те.
Николай та хушнă пĕр ĕçрен те пăрăнман: вăрманта мăк та кăларнă, хирте тырă вырнă, лашапа кĕлте турттарнă...
Çăмăл мар пулсан та мал ĕмĕтлĕ ача ялти шкулта сакăр класран ăнăçлă вĕренсе тухнă. Каллех ун чухнехи «Красная звезда» колхозра ĕçлеме тытăннă. Аллăмĕш çулсен вĕçĕнче çамрăка уй-хир бригадин бригадирĕ пулма уйăрса лартнă. Тăватă çул пулнă Николай Николаевич çак ĕçре. Палтиелĕнчи икĕ колхоз «Мир» хуçалăха пĕрлешсен та вăл колхоз производствинчен уйрăлмасть, тĕрлĕрен ĕçсенче вăй хурать, мĕн тивĕçлĕ канăва кайичченех хăйĕн хастарлăхĕпе палăрса тăрать.
Сăмах май, Н.Юманов Зоя мăшăрĕпе икĕ ывăлпа пĕр хĕр çуратса ÿстернĕ, пурнăç çулĕ çине кăларнă. Вĕсем хăйсем те тахçанах çемьеллĕ ĕнтĕ, чун савăнмалăх мăнуксем те сахал мар.
Николай Николаевичпа мăшăрĕ иккĕшĕ те – ĕç ветеранĕсем, вĕсене çак ятлă медальпе те чысланă.
Юмановсем килти хуçалăхра выльăх-чĕрлĕх, чăх-чĕп усраççĕ, пахча-çимĕç çитĕнтереççĕ. Ĕçлемесĕр пĕр кун та лармасть Николай Николаевич. «Сывлăх пур чух усă кÿрсе пурăнасчĕ-ха», - тет ĕç ветеранĕ.