11 ноября 2009 г.
ШĂМĂРШĂРИ Культура керменĕнче творчество сезонне уçса пысăк концерт йĕркелесси юлашки çулсенче йăлана кĕчĕ ĕнтĕ. Халăх çакна кашни çулах кăмăллăн йышăнать, программăна курма зал тулли пухăнать.
Çак кунсенче иртнĕ концерт программине «Антонина» ташă ушкăнĕ уçрĕ. Вăтам ушкăнри хĕрачасем «Ритм планеты» ташша çăмăллăн та килĕшÿллĕ хусканусемпе ташласа пачĕ, концерт курас кăмăла çĕклесе ячĕ.
Çĕр ĕçченĕн çулталăкне халалланă «Хлеб всему голова» литературăпа музыка композицийĕнче Шăмăршăри халăх театрĕн ача-пăча коллективĕ, арçынсен халăх хорĕ тата Чăваш Республикин тава тивĕçлĕ культура ĕçченĕ Е.Муравьева солистка пĕр-пĕринпе çыхăнуллăн ылмашăнса пырса, искусство мелĕсемпе вырăнлă усă курса, сцена ăсталăхĕпе вăйлатса художество номерне çÿллĕ шайра кăтартса пама пултарчĕç. Халăх театрĕ кăтартнă, аслă Çĕнтерÿ тунăрăнпа 65 çул çитсе пынине халалланă «И помнит мир спасенный» литературăпа музыка композицине те тулли зал ăшшăн йышăнчĕ. В.Львова режиссер ертсе пынипе, хаяр вăрçă пуçланас умĕнхи телейлĕ самантсене, хăйсен савнийĕсемпе сывпуллашса йĕкĕтсем фронта тухса кайнине, унта çапăçусем вăхăтĕнче салтаксем канма чарăннине, çап-çамрăк яш тăшманпа паттăррăн çапăçса пуç хунине тата боецсем Çĕнтерÿпе киле таврăннине художество мелĕсемпе чуна хумхантармалла сăнласа пачĕç театр артисчĕсем.
Яланхи пекех, В.Харитонов ертсе пыракан арçынсен халăх хорĕ «Поклонимся великим тем годам» тата «Тоска по Родине» юрăсене мăнаçлăн та пысăк хавхаланупа шăрантарчĕ. Хĕрарăмсен ансамблĕ (руководителĕ Е.Еремеева) «Эй, тусăм, яра пар», «Бабье лето» юрăсене чуна тивмелле юрларĕ. «Аленушка» ача сачĕн вокал ушкăнĕ (С.Кудряшов) «Урожайная» юрăпа савăнтарчĕ.
Солистсем концерт программине хăйне евĕр илемлетрĕç. Е.Воронцова, В.Павлов, А.Петрова, С.Кудряшов, В.Кудряшовапа Г.Корнякова хăйсен хитре сассисемпе залра ларакансен чун-чĕрине ăшă туйăмсем кÿчĕç.
Илемлĕ ташăсемсĕр Культура керменĕнче пĕр концерт та иртмест. «Антонина», «Фламинго» ташă коллективĕсем вырăс, чăваш тата тутар ташшисене пысăк ăсталăхпа ташласа килентерчĕç.
Программăна Л.Владимировапа В.Павлов конферансье пулса ертсе пычĕç.
Концерт вĕçленсен, хăй тĕллĕн вĕреннĕ артистсене тав туса, залра ларакансем чылайччен алă çупрĕç.