18 ноября 2009 г.
«ÇЕÇПĔЛ хунавĕсем» район конкурсĕн Положенийĕпе килĕшÿллĕн, Васан ял поселенийĕн библиотекинче зонăри мероприяти иртрĕ. Конкурса Виçпÿрт Шăмăршăри, Палтиелĕнчи, Карапай Шăмăршăри, Васанти, Шăмăршăри тата Анат Чаткасри шкулсенче вĕренекенсем хутшăнчĕç. Мероприятие килнисем малтанах «Кăвар чĕреллĕ поэт» выставка-портретпа паллашрĕç.
Илемлĕ вулакансен конкурсне Р.Г.Смаева уçрĕ. Вăлах Çеçпĕл Мишшин кун-çулĕпе творчестви çинчен каласа пачĕ. Ачасен «Мерчен» халăх фольклор ансамблĕн юррисене те кăмăллăн йышăнчĕç мероприятие килнисем.
Чăваш поэзийĕн классикĕ Çеçпĕл Мишши çырнă сăвăсене вĕренкенсем хавхаланса вуларĕç. Жюри итогсене пĕтĕмлетсен «Чи лайăх вулакан» номинацире В.Габитова (Палтиел) – пĕрремĕш, А.Егоров (Виçпÿрт Шăмăршă) – иккĕмĕш, И.Лаврентьева (Карапай Шăмăршă) виççĕмĕш вырăнсене тухни палăрчĕ. «Пĕчĕк вулакан» номинацире – С.Тихонова (Васан), А.Давыдова (Шăмăршă), Р.Валеев (Палтиел), «Артистла вулакан» номинацире А.Кузьмина (Палтиел), К.Кудрявцев (Шăмăршă), А.Муллина (Виçпÿрт Шăмăршă) 1-3 вырăнсене йышăнчĕç. Жюри çавăн пекех Е.Ларшникова конкурсра хăйнеевĕрлĕхпе палăрнине асăнчĕ. Çĕнтерÿçĕсем Грамотăсемпе призсем илчĕç.
Васанти Н.Г.Павлов, Кивĕ Шăмăршăри Г.Н.Ларшников тата Карапай Шăмăршăри Э.И.Семенов Çеçпĕл Мишшине халалласа çырнă хăйсен сăввисене пысăк туйăмпа вуласа пани район конкурсĕн пĕлтерĕшне ÿстерчĕ, илемлетрĕ.