18 ноября 2009 г.
ÇАМРĂКСЕНЕ патриотла воспитани парассине вăйлатас, пултаруллă сцена ăстисене тупса палăртас, театр коллективĕсен репертуарне художество енĕпе çÿллĕ шайри произведенисемпе пуянлатас тĕллевпе райадминистрацин вĕрентÿ, çамрăксен политики тата культура пайĕ Пуянкасси ялĕнче районти театр коллективĕсен конкурсне йĕркелерĕ.
Çак конкурса хутшăнса, Карапай Шăмăршăри Культура çурчĕ çумĕнчи драма кружокĕ (руководителĕ – Раççей Федерацийĕн тата Чăваш Республикин культурин тава тивĕçлĕ ĕçченĕ З.Падюкова) А.Толстой пьеси тăрăх хатĕрленĕ «Яла таврăнсан» спектакль кăтартрĕ. Палтиелсем «Юрататăп Тăван çĕршыва» литературăпа музыка композицийĕпе паллаштарчĕç (Т.Долгова хатĕрленĕ). Пуянкассинчи Культура çурчĕ çумĕнчи театр коллективĕ вара сцена çине В.Михайлов журналист çырнă «Эпир вилмешкĕн çуралман» поэма тăрăх хатĕрленĕ «Паттăр ентешĕмĕр – Валерий Кузнецов» литературăпа музыка композицийĕпе тухрĕ (Л.Михайловапа А.Андронов хатĕрленĕ).
Хăй тĕллĕн вĕреннĕ артистсенчен кашниех сцена ăсталăхне кăтартма тăрăшрĕ. «Чи лайăх спектакль» номинаци тăрăх карапайсем Грамотăпа приза тивĕçрĕç. «Чи лайăх режиссер» тата «Чи лайăх сценари» номинацисенче Палтиелĕнчи Т.Долгова палăрчĕ. «Музыка енĕпе ăста илемлетекен» номинацире жюри Пуянкассинчи А.Андронов баяниста чысларĕ.