21 ноября 2009 г.
НОЯБРĔН 18-мĕшĕнче районта культурăпа искусствăн паллă деятелĕн, К.В.Иванов ячĕллĕ Чăваш академи драма театрĕн илемлĕх ертÿçипе режиссерĕн, СССР халăх артисчĕн В.Н.Яковлевăн 70 çулхи юбилейне халалланă мероприятисем иртрĕç.
Уяв кăнтăрла Валерий Николаевичăн тăван ялĕнче – Виçпÿрт Шăмăршăра пуçланчĕ. Район пуçлăхĕ В.П.Фадеев, юбилярпа унăн творчество коллективĕ малтанах паллă режиссер çуралса ÿснĕ çуртра, В.Н.Яковлев ячĕллĕ паркра пулчĕç.
Паллă ентеше чыслама ялти Культура çуртне халăх йышлă пухăнчĕ. Район пуçлăхĕ В.П.Фадеев Валерий Николаевича чаплă юбилей ячĕпе пĕтĕм чун-чĕререн тав турĕ, искусствăри хăйĕн пархатарлă ĕçĕсемпе район чысне çÿле çĕкленĕшĕн тав турĕ, ун ячĕллĕ паркри кану вырăнĕн Сертификатне пачĕ. Пуянкасси ял поселенийĕн пуçлăхĕ В.Н.Алексеев асăннă паркăн Паспортне, вырăнти шкул директорĕ Л.Н.Падиаров талантлă режиссер çуралса ÿснĕ çуртăн илемлĕ ÿкерчĕкне парнелерĕç.
Каçхине Шăмăршă ялĕнче уяв малалла тăсăлчĕ. К.В.Иванов ячĕллĕ драма театрĕн артисчĕсем, студентсем В.Н.Яковлев режиссер лартнă тĕрлĕ спектакльсенчи сыпăксене выляса пачĕç, Валерий Николаевичăн вăрçăра пуç хунă ашшĕне асăнса литературăпа музыка композицийĕ кăтартрĕç.
Мероприяти «Ялта» драмăри туй сыпăкĕнче В.Н.Яковлев артист пулса вылянипе вĕçленчĕ.