21 ноября 2009 г.
– ВЫЛЬĂХ-ЧĔРЛĔХСĔР картиш пушă кил пекех туйăнать, – тет Çĕнĕ Чукалта пурăнакан И.Ильичев.
Чăннипех мини-ферма теме пулать ун хуçалăхне. Хальхи вăхăтра Иван Ильич сăвăнакан виçĕ ĕне, çичĕ пăру, çакăн чухлех сысна усрать. Хур-кăвакалĕ те самаях йышлă. Кунсăр пуçне, хурт-хăмăр ăсти те вăл – вĕллесем те чылай.
Выльăх йышлă усракансем ялта татах та йышлă. Акă, сăмахран, Мария Ильичеван вăтăра яхăн сурăх, картиш тулли чăх-чĕп, хур-кăвакал. Кроликĕсем те нумай. Хушма хуçалăх çирĕп пулни тупăш кÿнине тахçанах лайăх ăнланса илнĕ вăл: аш-какайĕ те, сурăх çăмĕ те сутмалăх та пур.
С.Бибуков та – канăçа пĕлмен çын. Икĕ ĕнепе икĕ пăру, тăватă сысна ун хуçалăхĕнче. Хурсем те нумай. Сергей Петрович выльăхсен шутне татах та ÿстерес шухăшлă. И.Матросовпа И.Шепейкинăн хуçалăхĕсенче те мăйракаллă шултра выльăхсем темиçешер пуç.
Юлашки çулсенче качака тытакансем те йышланчĕç. Çĕнĕ Чукалти Василий Бибуков, Вырăс Чукалĕнчи Иван Чашкин, Николай Белов ăна пилĕк-ултă пуç таранах усраççĕ. Сергей Угаринпа Сергей Ильичев вара кроликсем ĕрчетес тĕлĕшпе самаях пуян опыт пухнă. Вĕсенчен вĕренмелли сахал мар.
Ял çыннисем килти хуçалăха аталантарма патшалăхран çăмăллăхлă кредит илеççĕ. Кăçал кăна 5 миллион тенкĕне яхăн кредит илнĕ.