25 ноября 2009 г.
НОЯБРĔН 21-мĕшĕнче Санкт-Петербургри «Ленэкспо» выставка комплексĕнче «Единая Россия» политика партийĕн XI съезчĕ ĕçленĕ. Съезд ĕçне 600 ытла делегатпа 2000 хăна хутшăннă. Съезда Парти председателĕ, РФ премьер-министрĕ Владимир Путин уçнă.
«Единая Россия» партин XI съездĕнче РФ Президенчĕ Дмитрий Медведев сăмах тухса каланă. Дмитрий Анатольевич ертсе пыракан партин çĕршыври яваплăха çирĕп туймаллине, ялан малта пымаллине палăртнă.
Парти Председателĕ, РФ премьер-министрĕ Владимир Путин хăйĕн докладĕнче правительство кризиса хирĕç мĕнле ĕçлесе пынипе паллаштарнă, «Единая Россия» умне çĕнĕ задачăсем лартнă.
«Единая Россия» партин Аслă канашĕн Председателĕ, РФ Патшалăх Думин председателĕ Борис Грызлов та парти паян çĕршыври ертсе пыракан пысăк вăй пулнине палăртнă.
Съезд ĕçленĕ хушăрах «Ленэкспора» «Кризис тапхăрĕнче партисен социаллă яваплăхĕ» ятпа Пĕтĕм тĕнчери наукăпа практика форумĕ уçăлнă. Форумра сăмах илсе, Борис Грызлов çапла палăртнă: «2010 çулхи лару-тăру çăмăл пулмассине эпир лайăх ăнланатпăр. Анчах та каялла чакмастпăрах. Эпир мĕн пур фронтпа малалла пыратпăр».