28 ноября 2009 г.
САНКТ-ПЕТЕРБУРГРАН, «Единая Россия» политика партийĕн XI съездĕнчен таврăнсан район пуçлăхĕ, партин вырăнти Политканашĕн секретарĕ В.П.Фадеев «кăштах канам-ха» темен, тÿрех ĕçе васканă. Ытлари кун темиçе çынна та харпăр-хăй ыйтăвĕпе йышăннă пулин те, съезд делегачĕ «Шăмăршă хыпарĕ» хаçат журналисчĕпе сăмахлама вăхăт тупрĕ.
– «Единая Россия» парти съездĕнчен пысăк хавхаланупа, çĕршыв чăннипех те малалла каясса çирĕп шанса таврăнтăм, – терĕ В.П.Фадеев. – «Единая Россия» парти, ман шутпа, пĕтĕм обществăна хăй хыççăн туртма пултаракан вăй пулса тăчĕ. Парти хăй каланă сăмахсемшĕн тата хăй тунă ĕçсемшĕн тÿрремĕнех яваплă. Çакă съездра парти лидерĕ В.В.Путин туса панă докладра та яр-уççăн курăнчĕ. Паян çĕршыв ертÿçисем тытса пыракан çул-йĕр «Единая Россия» парти политикипе уйрăлми çыхăннă.
– Валерий Петрович, «Единая Россия» парти тĕнче кризисне пула аллине усни сисĕнмест-и;
– Пачах та урăхла, кризис парти çирĕплĕхне тĕрĕслерĕ, йывăрлăхсенчен хăраса вăл тĕмсем хыçне пытанмарĕ, çанна тавăрса умри проблемăсене татса парас ĕçе хутшăнать.
Çак проблемăсенчен пĕри – халăха ĕçпе тивĕçтересси. Хамăрăн пысăках мар района илес пулсан та, ку ыйту çивĕч тăмасть теме çук. Район администрацийĕ, халăха ĕçпе тивĕçтерекен центрпа пĕрле, граждансене харпăр-хăй ĕçне йĕркелесе яма пулăшать. Юлашки вăхăтра кăна-ха çирĕме яхăн çын бизнес-проект хатĕрлесе харпăр-хăй ĕçне йĕркелеме старт илчĕ. Ĕçсĕррисен йышĕнче тăнă çынсем мăйракаллă шултра выльăхсемпе вĕлле хурчĕсем ĕрчетме, çĕр çинче ĕçлеме, пысăках мар цехсемпе мастерскойсем уçма шутлани кăмăла çĕклет. Съездра В.В.Путин çакна палăртрĕ: халăх ытларах тупăш илтĕр, пурăнмалли çурт-йĕр туянма пултартăр тесен пирĕн мĕнпур майсемпе усă курмалла. Харпăр-хăй ĕçне йĕркелекенсене çитес çул патшалăх 147-шер пин тенкĕ парса пулăшĕ. Ÿркенмесен, çак укçапа пĕчĕк бизнесра малтанхи утăмсем тума пулатех.
В.В.Путин хăйĕн докладĕнче çитес çул федераллă бюджетран çул-йĕр тума, агропромышленноç комплексне аталантарма, экономикăри пысăк технологи отраслĕсене, халăха вĕрентес ĕçпе сывлăха сыхлас ĕçе пулăшма укçа-тенкĕ сахал мар уйăрасси çинчен каларĕ. Экономикăна çирĕплетме предприятисене патшалăх гарантийĕпе 500 миллиард тенкĕ кредит уйăрса парĕç.
– Çынсемпе тĕл пулнă чух, чылайăшĕ кризис социаллă программăсене пурнăçлама чăрмантарĕ тесе пăшăрханать. Съездра çак ыйтăва çĕклемерĕç-и;
– Халăх пурнăçне çăмăллатма пулăшакан программăсем – ĕçмелли таса шывпа тивĕçтересси, пурăнмалли çурт-йĕр тăвасси тата ытти те – малалла пурнăçланса пырĕç. Кун пирки урăхла сăмах та пулма пултараймасть. Приоритетлă наци проекчĕсем пурнăçланасси те чарăнса лармĕ. Физкультурăпа спорт тата больница комплексĕсем килес çул та çĕкленĕç. Çав шута Шăмăршăра тăвакан физкультурăпа спорт комплексне те кĕртмелле. Ăна хута яма патшалăх кирлĕ чухлĕ укçа-тенкĕ уйăрать.
Килти хушма хуçалăха аталантарма килес çул та çăмăллăхлă кредит илме май пулĕ. Кĕскен каласан, «Единая Россия» парти кризиса хирĕçле мерăсем туллин пурнăçланччĕр тесе мĕнпур вăй-халне парĕ.
Раççей Президенчĕ Д.А. Медведев хăйĕн «Раççей, малалла!» статйинче тата çĕршывăн Федераллă Пухăвне янă Çырăвĕнче калани съезд йышăнăвĕсемпе питĕ çывăх тăраççĕ. Çак статьяпа Çырăва сÿтсе явма пирĕн район çыннисем те активлă хутшăнчĕç, вĕсем çĕршыв Президенчĕн шухăш-ĕмĕчĕсене пĕтĕмпех ырлани палăрчĕ.
Чăваш Ен Президенчĕ, «Единая Россия» партин Аслă Канашĕн членĕ Н.В.Федоров съезд ĕçне хакласа çапла каларĕ: «Единая Россия» парти çĕршывра тата регионсенче пулса иртекен мĕнпур ĕçшĕн яваплă пулассинчен пăрăнманни унăн авторитетне нумай ÿстерчĕ. Ку парти илемлĕ сăмахсем каласа çынсене шантаракан парти мар, чăннипех те ĕçлеме пултаракан пысăк вăй.
Эпĕ те çапла шутлатăп. Ертсе пыракан партирен халăх пысăк ĕçсем кĕтет.